გირჩის ერთ-ერთი ლიდერის, ალექსანდრე რაქვიაშვილის განცხადებით, ნაციონალური მოძრაობა შარლ მიშელის დოკუმენტის დე ფაქტო ყველა პუნქტს აღიარებს და უცნაურია, რომ ისინი ამ დოკუმენტს ხელს არ აწერენ.

"მოხარული ვარ, რომ ნაციონალური მოძრაობა როგორც იქნა შემოდის პარლამენტში, ეს მნიშვნელოვანია, ზოგადად, რომ ოპოზიცია მეტად ეფექტიანი იყოს, ხოლო ის, რომ შარლ მიშელის დოკუმენტს ნაციონალური მოძრაობა ხელს არ აწერს ძალიან უცნაურია იმიტომ, რომ დე ფაქტო ყველა პუნქტს აღიარებს ნაციონალური მოძრაობა ამ შეთანხმებიდან. იმ პუნქტს, სადაც გაწერილი იყო გირაოს საკითხი, იმ პუნქტს, სადაც რეფორმების საკითხი, თუნდაც 43%-ის, თუ ეს ყველა პუნქტი აღიარებულია, მაშინ უბრალოდ არ მესმის, რატომ არ უნდა მოაწერონ ხელი", — ამბობს რაქვიაშვილი.

30 მაისს ნაციონალურმა მოძრაობამ საკანონმდებლო ორგანოში შესვლის გადაწყვეტილება მიიღო. მიუხედავად ამისა, პარტია შარლ მიშელის დოკუმენტს ხელს არ მოაწერს. გადაწყვეტილება პოლიტსაბჭოს შემდეგ გახდა ცნობილი.