დაავადებათა კონტროლის ეროვნული ცენტრის დირექტორის მოადგილის, პაატა იმნაძის განცხადებით, ინდური შტამის მკურნალობის განსხვავებული პროტოკოლი არ არსებობს და ერთადერთი რაც სხვებისგან განასხვავებს, სწრაფი გავრცელების უნარია, ისევე როგორც ეს ჰქონდა ბრიტანულ შტამს. ამის შესახებ მან რუსთავი 2-ის ეთერში ისაუბრა.

"არაფერი დიდი განსხვავებული პროტოკოლი მკურნალობის არ არსებობს ინდურ შტამზე, ზუსტად ისეთივეა, როგორიც ე.წ. ბრიტანული შტამის და მანამდე რაც იყოს ვუჰანის თუ ევროპული შტამები. ამიტომ დიდი განსხვავება აქ ნამდვილად არც მკურნალობაში არ არის.

ჯანმოს გენერალურმა დირექტორმა განაცხადა, რომ ყველა ვაქცინა, რაც დღეს არის ავტორიზებული, ჩვეულებრივად მუშაობს ამ შტამების წინააღმდეგ. ერთადერთი რაც ამ შტამს, ისევე როგორც ბირტანულ შტამს ახასიათებდა ჩვეულებრივისგან განსხვავებით, არის ის, რომ ის უფრო ადვილად გადადის ადამიანისგან ადამიანზე და შესაბამისად, უფრო სწრაფი გავრცელების უნარი აქვს", — თქვა მან.

ინდური შტამის შემთხვევები საქართველოში

დაავადებათა კონტროლის ცენტრის ინფორმაციით, საქართველოში ინდური შტამით ინფიცირების შემთხვევები დაფიქსირდა. კერძოდ, როგორც NCDC-ში ამბობენ, ინდური შტამი დაუფიქსირდა ქვეყანაში შემოსულ 5 მოგზაურს.

დააავადებათა კონტროლის ცენტრის დირექტორის, ამირან გამყრელიძის განცხადებით, 5-დან 2 საქართველოს მოქალაქეა. მისივე თქმით, 3-მა უცხოელმა ქვეყანა უკვე დატოვა, საქართველოს მოქალაქეების კონტაქტები კი იდენტიფიცირებულნი და იზოლირებულნი არიან.

"მათზე მიმდინარეობს მეთვალყურეობა. ისინი არიან სახლის პირობებში და დაავადება მიმდინარეობს მსუბუქად", — განაცხადა მან.

როგორც გამყრელიძემ აღნიშნა ისინი საქართველოში მაისის შუა რიცხვებში შემოვიდნენ და შუა აღმოსავლეთის ერთ-ერთ ქვეყანაში მოგზაურობის ისტორია ჰქონდათ.

გამყრელიძის თქმით, ინდური შტამის გამოვლინება ხდება სპეციფიური PCR ტესტით და შემდგომ დასტურდება გენომის სეკვენირებით.