ნამახვანჰესის მშენებლობის საწინააღმდეგო აქცია 23 მაისს, რესპუბლიკის მოედანზე გაიმართება. აქტივისტის, ვარლამ გოლეთიანის თქმით, მოქალაქეები შეკრებას 14:00 საათიდან დაიწყებენ. იგი ამბობს, რომ ეს იქნება განგრძობადი აქცია და რაიონებში მცხოვრები ადამიანები ემზადებიან თბილისში დასარჩენად.

"23-მა მაისმა უნდა თქვას თავისი სიტყვა ამ მიმართულებით, რომ ხელისუფლებამ შეხედოს ერთ მნიშვნელოვან რამეს, რომ ჩვენი სიმრავლე ვერ იქნება დაძლევადი ვერცერთი იმ მისთვის კარგად ნაცადი ხერხით, რაც არის შავი პიარ-კამპანია და ტალახის სროლა ჩვენი მოძრაობისთვის სხვადასხვა მიმართულებით — გაშავება, მარგინალიზება და ა.შ. ყველაფერი ეს ჩვენ უნდა დავძლიოთ ჩვენი სიმრავლით", — განაცხადა ვარლამ გოლეთიანმა.

ნამახვანჰესის მშენებლობის მოწინააღმდეგე აქტივისტებმა პროტესტის დედაქალაქში გაგრძელება რამდენიმე კვირის წინ დააანონსეს. ისინი ამბობენ, რომ ხელისუფლებასთან მოლაპარაკებისას მათთვის სასურველ პასუხებს ვერ იღებენ.

რამდენიმე დღის წინ აქტივისტებმა რიონის ხეობაში მესამე კარავი გაშალეს, რითაც მშენებლობამდე მიმავალი ყველა გზა გადაკეტეს.

გაიგე მეტი: