ახალი ზელანდიის პარლამენტში ჰაკას შესრულების შემდეგ მაორის პარტიის ლიდერს, რავირი ვაიტიტის სხდომათა დარბაზი დაატოვებინეს. წელს ეს უკვე მეორე შემთხვევაა, როცა დეპუტატს დარბაზიდან გასვლა მოუწია.

თებერვალში მას დარბაზი იმის გამო დაატოვებინეს, რომ ჰალსტუხის ტარებაზე თქვა უარი. პოლიტიკოსი აცხადებდა, რომ ეს მოთხოვნა ახშობს მკვიდრი მოსახლეობის კულტურას და მოგვიანებით, პარლამენტმა ეს წესი გააუქმა.

რავირი ვაიტიტი სიტყვით მაშინ გამოვიდა, როცა 12 მაისს პრემიერმინისტრი ჯასინდა არდერნი კანონმდებლების კითხვას პასუხობდა. მაორის პარტიის დეპუტატმა ოპოზიციონერი კოლეგები რასისტულ პროპაგანდასა და რიტორიკაში დაადანაშაულა.

პარლამენტის სპიკერთან კამათის შემდეგ, რა დროსაც ვაიტიტის მიკროფონი გაუთიშეს, მან ჰაკას შესრულება დაიწყო. ამ დროს კი დეპუტატს დარბაზის დატოვება მოსთხოვეს.

CNN-ის ინფორმაციით, სხდომა იმ დროს შეწყდა, როცა მემარჯვენე პარტიის ლიდერი, ჯუდით კოლინსი მკვიდრი მოსახლეობის სუვერენიტეტთან დაკავშირებით პრემიერმინისტრს კითხვებს უსვამდა. კოლინსის პარტია კრიტიკულადაა განწყობილი არდერნის მთავრობის ახალი ინიციატივის მიმართ, რომელიც მაორი ხალხისთვის ჯანდაცვის სისტემაში უთანასწორობის აღმოფხვრას ისახავს მიზნად.

"ბოლო ორი კვირის განმავლობაში tangata whenua-ს მიმართ რასისტული პროპაგანდა და რიტორიკა იყო", — განაცხადა დეპუტატმა და მაორის ტერმინი გამოიყენა, რომელიც ახალი ზელანდიის მკვიდრი მოსახლეობის აღსანიშნავად გამოიყენება.

"ეს არამხოლოდ შეურაცხმყოფელია, არამედ რეპუტაციის შემლახავია საკანონმდებლო ორგანოსთვის", — თქვა ვაიტიტიმ, რაზეც სპიკერმა უპასუხა, რომ ყოველკვირეული დებატებისას არაფერი დარღვეულა.

"როდესაც საუბარია მკვიდრი მოსახლეობის უფლებების შესახებ შეხედულებებზე, ეს შეხედულებები უნდა მოდიოდეს მკვიდრი მოსახლეობის მხრიდან... ისინი ვერ განისაზღვრება იმ ხალხის მხრიდან, რომელიც მკვიდრ მოსახლეობას არ განეკუთვნება", — განაცხადა მან და გააკრიტიკა "მუდმივი შეურაცხყოფა".

გამოსვლის დროს ვაიტიტის მიკროფონი გაითიშა და სპიკერმა მას ადგილისკენ მიუთითა. საწინააღმდეგოდ, დეპუტატმა ჰაკას შესრულება დაიწყო. რის შემდეგაც სპიკერმა ვაიტიტის დარბაზი დაატოვებინა.

მაორი ახალი ზელანდიის მოსახლეობის 15 პროცენტს შეადგენს და მათ თავისი მიწების დიდი ნაწილი დიდი ბრიტანეთის კოლონიალიზაციის დროს დაკარგეს. ათასობით მკვიდრი მოსახლე სოციალური და სამოქალაქო უფლებებისთვის წლების განმავლობაში იბრძოდა და მთავრობას ეკონომიკური და სოციალური უთანასწორობის გამო აკრიტიკებდა.

თებერვალში პრემიერმინისტრმა ჯასინდა არდერნმა განაცხადა, რომ მაორის ისტორიაზე ეროვნული პროგრამა შეიქმნებოდა. გარდა ამისა, გასული წლის ნოემბერში მკვიდრი მოსახლე მინისტრად პირველად დაინიშნა — ნანაია მაჰუტამ საგარეო საქმეთა მინისტრის პოსტი დაიკავა.