ლელოს ლიდერი, მამუკა ხაზარაძე ამბობს, რომ თბილისის მერის არჩევნებში მათ საკუთარი კანდიდატი უნდა ჰყავდეთ. რუსთავი 2-ის ეთერში მან ასევე თქვა, რომ კანდიდატთან დაკავშირებით პარტიაში ჯერ არ უმსჯელიათ.

"მე ვფიქრობ, რომ ახალი სახეები უნდა იქნას წარმოჩენილი ადგილობრივ არჩევნებზე, მერის არჩევნებზეც. ვფიქრობ, ოპოზიცია უნდა იყოს კოორდინაციაში და უნდა იყოს კონკურენცია ოპოზიციასაც შორის. ჩვენ ვფიქრობთ, რომ ჩვენ ვართ პარტია და ჩვენ უნდა გვყავდეს ჩვენი კანდიდატი", — აღნიშნა მამუკა ხაზარაძემ.

შემოდგომაზე თვითმმართველობის არჩევნები უნდა ჩატარდეს. ოპოზიციაში უკვე საუბრობენ იმაზე, რომ ამ არჩევნებზე ისინი კვლავ გაერთიანებული სახით უნდა წარდგნენ. ზოგიერთი იმასაც აღნიშნავს, რომ თბილისის მერობის არჩევნებში ოპოზიციამ საერთო კანდიდატად ნაციონალური მოძრაობის ლიდერი, ნიკა მელია უნდა განიხილოს.

აღნიშნულ მოსაზრებას არ იზიარებს სტრატეგია აღმაშენებლის ლიდერი, გიორგი ვაშაძე. მისი თქმით, თვითმმართველობის არჩევნებში ენმ-ის კანდიდატის მხარდაჭერა "მარცხის ფორმულაა".