ყირგიზეთ-ტაჯიკის საზღვრის სადავო მონაკვეთის გასწვრივ ადგილობრივ მოსახლეობას შორის შეტაკებები გაიზარდა. რადიო თავისუფლებას ცნობით, შედეგად არასტაბილურ რეგიონში ერთი ადამიანი გარდაიცვალა.

ყირგიზეთის მთავრობამ 29 აპრილს განაცხადა, რომ წინა დღეს შეტაკებების დროს დაჭრილი ადამიანის გარდაცვალებამ მეტი ძალადობა გამოიწვია.

ყირგიზეთის სამხრეთ რეგიონის პოლიციამ ესკალაციაში ტაჯიკეთის მოქალაქეები დაადანაშაულა და თქვა, რომ მათ სროლა სოფელ კოკ-ტაშში მდებარე სამხედრო ნაწილზე დაიწყეს.

ტაჯიკეთის სასაზღვრო სამსახურმა ყირგიზეთის ბრალდება უარყო და თქვა, რომ ყირგიზეთის სამხედრო მოსამსახურეებმა პირველებმა ისროლეს.

ერთი დღით ადრე, ტაჯიკეთის ხელისუფლებამ თქვა, რომ ტაჯიკეთის შვიდი მოქალაქე დაშავდა. მათივე თქმით, ჩხუბი მას შემდეგ დაიწყო, რაც საზღვრის ორივე მხარეს ადგილობრივი მცხოვრებლები ერთმანეთს დაუპირისპირდნენ და ერთმანეთს ქვები ესროლეს.

ტაჯიკურმა მხარემ, ასევე, განაცხადა, რომ შეტაკებები ყირგიზმა ჩინოვნიკებმა წამოიწყეს, რაც ბიშკეკმა უარყო.

დაპირისპირების მიზეზად ტაჯიკი ჩინოვნიკების მიერ გოლოვნოის წყლის გამანაწილებელ ცენტრში სათვალთვალო მოწყობილობების დამონტაჟება სახელდება, რომელიც როგორც ყირგიზეთი ამბობს, მდებარეობს იმ ადგილას, სადაც სუვერენიტეტი ჯერ განსაზღვრული არ არის.

ყირგიზეთის პრეზიდენტმა სადირ ჯაფაროვმა ფეისბუქზე განცხადება გაავრცელა და ყირგიზეთის მოქალაქეებს მოუწოდა შეინარჩუნონ სიმშვიდე და პროვოკაციებს არ აყვნენ.

"ჩვენს ტაჯიკ ძმებთან ერთად, ყოველთვის ვიპოვით საერთო ენას და მოვაგვარებთ ყველა საკითხს ჩვენს უძველეს მიწაზე მეზობლური ინტერესების შენარჩუნებისა და გათვალისწინებით. ისინი, ვინც კონფლიქტის გაღვივებას ცდილობენ, საშიშები არიან", — აღნიშნა ჯაფაროვმა განცხადებაში.

უზბეკეთის საგარეო საქმეთა სამინისტრომ ყირგიზეთ-ტაჯიკეთის საზღვარზე დაძაბულობაზე შეშფოთება გამოხატა.

1991 წელს საბჭოთა კავშირის დაშლის შემდეგ, ყოფილი საბჭოთა რესპუბლიკების მრავალი სასაზღვრო რეგიონი სადაო გახდა.

განსაკუთრებით რთულ ვითარებას ფერღანას სადაო ხეობა წარმოადგენს, სადაც ერთმანეთს ყირგიზეთის, ტაჯიკეთისა და უზბეკეთის საზღვრები ხვდება.