ქართული ოცნების დეპუტატი, შალვა პაპუაშვილი წვრილმანი ხულიგნობისა და პოლიციის დაუმორჩილებლობისთვის სანქციები გაზრდის კანონპროექტს ეხმაურება.

"მოვისმინე მე შეფასებები, თითქოს ეს ამ პოლიტიკურ აქტივს გარკვეულ თვითცენზურას შეუქმნის და ისინი, არ ვიცი, რისთვის თვითცენზურას, რომ ისინი არ ხულიგნობდნენ?! თუ ამას გულისხმობენ თვითცენზურაში და მსუსხავ ეფექტში, ძალიან კარგი თუ ამ თვითცენზურას შექმნის და ისინი ხულიგნობას თავს დაანებებენ", — განაცხადა პაპუაშვილმა.

პაპუაშვილი "პოლიტიკურ აქტივს" უწოდებს ადამიანებს, რომლებსაც, ხშირად, აქციების დროს სწორედ ამ მუხლებით აკავებენ.

"ჩვენ რასაც ვხედავთ ქუჩაში, ეს არ არის სამოქალაქო აქტივიზმი. ეს არის პოლიტიკური პარტიის აქტივი, რომელსაც ჩვენ გარეთ ვხედავთ კარვებში პარლამენტის წინ, აქციებზე პარლამენტთან თუ სხვაგან იქნება", — ამბობს პაპუაშვილი.

საქართველოს ახალგარზრდა იურისტთა ასოციაციაში (საია) აცხადებენ, რომ ადმინისტრაციულ სამართალდარღვევათა კოდექსში შესატანი ცვლილებები დააზიანებს ადამიანის უფლებრივ მდგომარეობას.

"სანქციის გამკაცრება იქონიებს მსუსხავ ეფექტს მშვიდობიანი შეკრებისა და გამოხატვის თავისუფლების რეალიზებაზე", — აცხადებენ ორგანიზაციაში.

საია, ასევე, ხაზს უსვამს, რომ ადმინისტრაციულ სამართალდარღვევათა კოდექსი ისედაც საჭიროებს სისტემურ რეფორმას და ამის ნაცვლად სანქციების გამკაცრება არსებულ მუხლებზე, "ზრდის ადამიანის უფლებებში არამართლზომიერი ჩარევის შესაძლებლობებს".

ახალი კანონპროექტის თანახმად, ადმინისტრაციულ სამართალდარღვევათა კოდექსში ცვლილებები შედის, რის შედეგადაც წვრილმანი ხულიგნობისა (166-ე მუხლი) და სამართალდამცველის მოთხოვნისადმი დაუმორჩილებლობისთვის (173-ე მუხლი) სანქციები იზრდება.

ამასთან ცვლილება ეხება 12-საათიან პატიმრობასაც. კერძოდ, მოქმედ კანონში წერია, რომ ადმინისტრაციული სამართალდარღვევის ჩამდენის დაკავების ვადა არ უნდა აღემატებოდეს 12 საათს, ხოლო თუ ეს დაკავება არასამუშაო დროს ემთხვევა, ადამიანი შეიძლება დროებითი მოთავსების იზოლატორში მოათავსონ საქმის განხილვამდე, თუმცა დაკავების საერთო ვადა არ უნდა აღემატებოდეს 48 საათს. გასულ წელს საკონსტიტუციო სასამართლომ დაადგინა, რომ 48-საათიანი ნორმა არაკონსტიტუციურია, რადგან განსხვავებულ მოპყრობას აწესებს. თუმცა ქართული ოცნება ცვლის არა ამ კონკრეტულ ჩანაწერს, არამედ ზრდის პირველ, 12-საათიან ვადას და მიზნად თანასწორი მოპყრობის უზრუნველყოფას ასახელებს.