სომხეთის პრემიერმინისტრი ნიკოლ ფაშინიანი სომხური სამოციქულო ეკლესიის კათოლიკოსს, გარეგინ მეორეს (ერისკაცობაში კტრიჩ ნერსისიანი) სახელმწიფო გადატრიალების მხარდაჭერასა და მრუშობაში ადანაშაულებს.

ფაშინიანი სოციალურ ქსელში გამოქვეყნებულ განცხადებაში აღნიშნავს, რომ თუ კათალიკოსი გარეგინ II მთავარეპისკოპოს ბაგრატ გალსტანიანის (ერისკაცობაში ვაზგენ გალსტანიანის) და შირაკის ეპარქიის წინამძღვარ მიქაელ აჯაპახიანის (ერისკაცობაში გევორგ აჯაპახიანის) დაკავებას უკანონოდ მიიჩნევს, მაშინ ის იზიარებს ზემოაღნიშნული პირების იდეოლოგიასა და გეგმებს სამხედრო გადატრიალების შესახებ.

"თუ კტრიჩ ნერსისიანი ვაზგენ გალსტანიანისა და გევორგ აჯაპახიანის დაკავებას უკანონოდ მიიჩნევს, მაშინ ის იზიარებს ზემოაღნიშნული პირების იდეოლოგიასა და გეგმებს სამხედრო გადატრიალების განხორციელების, ხალხის კედლების ქვეშ გამოკეტვისა და ქვეყანაში ქაოსის შექმნის შესახებ. ვაღარშაპატის გაფართოებული თემის არცერთი ტერიტორია, არ შეიძლება, იყოს დახურული სამართალდამცავი ორგანოების საქმიანობისთვის, მით უმეტეს, რომ, კტრიჩის და კიდევ რამდენიმე პირის წყალობით, ეს ტერიტორიები არ არის დახურული მრუშობისთვის", — წერს ნიკოლ ფაშინიანი.

"კავკაზსკი უზელის" ცნობით, 25 ივნისს, უსაფრთხოების ძალებმა სომხეთში ხელისუფლების ხელში ჩაგდებისთვის მზადების საქმესთან დაკავშირებით 90-ზე მეტი ჩხრეკა ჩაატარეს. სასამართლოს გადაწყვეტილებით, "წმინდა ბრძოლის" მოძრაობის ლიდერი, მთავარეპისკოპოსი ბაგრატ გალსტანიანი და კიდევ 14 პირი წინასწარი პატიმრობაში იმყოფებიან.

ერთი დღით ადრე, 24 ივნისს, სომხეთის პრემიერმინისტრმა, ნიკოლ ფაშინიანმა განაცხადა, რომ გადატრიალება აღკვეთილი იქნა და გამოაქვეყნა დოკუმენტი, რომელიც შეიცავდა ოპოზიციის სავარაუდო გეგმის ტექსტს მისი ხელისუფლებიდან ჩამოშორების შესახებ.

27 ივნისს, უსაფრთხოების ძალებმა დააკავეს შირაკის ეპარქიის წინამძღვარი, მიქაელ აჯაპახიანი, რომელიც ნებაყოფლობით გამოცხადდა საგამოძიებო კომიტეტში. მას ბრალი ძალაუფლების ხელში ჩაგდებისკენ მოწოდებაში წაუყენეს, რის შემდეგაც ეპისკოპოსი დააკავეს.

ასევე იხილეთ: