სოციალური კვლევისა და ანალიზის ინსტიტუტი (ISSA) მიმდინარე პროცესებთან დაკავშირებით, საქართველოს მოსახლეობის განწყობილებების 2025 წლის ივნისის კვლევას აქვეყნებს.

კვლევაში დეტალურადაა მოცემული მიმდინარე პროტესტების მიმართ არსებული დამოკიდებულება:

მიმდინარე საპროტესტო აქციებს საქართველოს მოსახლეობის უფრო დიდი ნაწილი (43%) ემხრობა, 35% წინააღმდეგია, 19% — 50/50, 2% — არ იცის პასუხი.

მხარდაჭერა მნიშვნელოვნად იზრდება თბილისელებში (62%) და პროევროპული ოპოზიციის ამომრჩევლებში (78%).

ქართული ოცნების ამომრჩევლებში საპროტესტო აქციებს არ ემხრობა გამოკვეთილი უმრავლესობა (75%).

კითხვაზე — რამდენად ეთანხმებით საქართველოში მიმდინარე პროტესტების მხარდამჭერთა მოთხოვნებს, პასუხები ასე გადანაწილდა:

ახალი საპარლამენტო არჩევნების დანიშვნის მომხრეა საქართველოს (55%), თბილისისა (63%) და პროევროპული ოპოზიციის ამომრჩეველთა (88%) უმრავლესობა.

რეგიონებში ახალ საპარლამენტო არჩევნებს მხარს უჭერს ყოველი მეორე.

ახალი საპარლამენტო არჩევნების დანიშვნას ეწინააღმდეგება ქართული ოცნების ამომრჩეველთა 82%.

კიდევ უფრო მეტი მხარდაჭერაა გამოხატული საპროტესტო აქციების დროს დაკავებული ადამიანების განთავისუფლების მიმართ:

საქართველო — 73%,
თბილისი — 79%,
რეგიონები — 70%,
პროევროპული ოპოზიციის ამომრჩევლები — 92%.

თვით ქართული ოცნების ამომრჩევლების 40% ემხრობა საპროტესტო აქციების დროს დაკავებული ადამიანების განთავისუფლებას (ეწინააღმდეგება — 50%)

ქართული ოცნების წინააღმდეგ პროტესტის გაგრძელებას ემხრობა:

საქართველოს მოსახლეობის უფრო დიდი ნაწილი (44%), არ ემხრობა 41%, არ იცის პასუხი 16%-მა;

ქართული ოცნების წინააღმდეგ პროტესტის გაგრძელებას ემხრობა თბილისელთა 60%-მდე, პროევროპული ოპოზიციის ამომრჩევლების 83%.

რეგიონების მოსახლეობის უფრო დიდი ნაწილი (45%) ფიქრობს, რომ პროტესტი უნდა შეწყდეს. ამას იზიარებს ქართული ოცნების ამომრჩეველთა 90%-მდე.

კითხვაზე — მიგაჩნიათ თუ არა, რომ სამართლიანია ჟურნალისტ მზია ამაღლობელის წინააღმდეგ წაყენებული ბრალდება, რომელიც სისხლის სამართლის პასუხისმგებლობას ითვალისწინებს, 4-დან 7 წლამდე პატიმრობით? — პასუხები ასე გადანაწილდა:

მზია ამაღლობელის მიმართ წაყენებულ ბრალდებას უსამართლოდ მიიჩნევს საქართველოს მოსახლეობის უმრავლესობა (59%).

უსამართლობის განცდა მაღალია რეგიონებშიც (54%), თუმცა, გაცილებით მაღალია თბილისელებში (70%).

პროევროპული ოპოზიციის და ქართული ოცნების ამომრჩევლებში დიამეტრალურად საპირისპირო შეფასებებია. თუმცა, ქართული ოცნების ამომრჩევლების 22% მზია ამაღლობელის
წინააღმდეგ წაყენებულ ბრალდებას უსამართლოდ მიიჩნევს, ხოლო თითქმის ამდენივე (23%) შეფასებას ვერ/არ გამოთქვამს.

საქართველოს (54%), თბილისის (66%) და, განსაკუთრებით, პროევროპული ოპოზიციის ამომრჩევლების (81%) უმრავლესობა მზია ამაღლობელს პოლიტპატიმრად მიიჩნევს. რეგიონებში თითქმის მეორეს (49%) მზია ამაღლობელი პოლიტპატიმრად მიაჩნია;
ქართული ოცნების ამომრჩევლების 60% ფიქრობს, რომ ამაღლობელს ბრალი სამართლიანად აქვს წაყენებული.

ოპოზიციის ლიდერების დაკავებასთან დაკავშირებით განწყობები ასეთია:

ირაკლი ოქრუაშვილის, ზურაბ ჯაფარიძის, ნიკა მელიასა და ნიკა გვარამიას პატიმრობა უსამართლოდ მიაჩნია საქართველოს მოსახლეობიდან ყოველ მეორეს (49%), სამართლიანად მიიჩნევს 29%, არ აქვს პასუხი 21%.

თბილისელებში ეს პოზიცია აქვს უმრავლესობას (59%), ხოლო რეგიონებში — 45%-ს.

ოპოზიციონერი ლიდერების პატიმრობას უსამართლოდ მიიჩნევს პროევროპული ოპოზიციის ამომრჩევლების დიდი უმრავლესობა (81%).

ქართული ოცნების ამომრჩევლების 67%-ს დასახელებული პირების პატიმრობა სამართლიანად მიაჩნია.

საქართველოს მოსახლეობისთვის ენმ-ის სავარაუდო დანაშაულების გამომძიებელი კომისიის საქმიანობა უფრო არალეგიტიმურია (41%), ვიდრე ლეგიტიმური (36%).

აღნიშნული კომისიის არალეგიტიმურობას აღიარებს თბილისელთა (58%) და პროევროპული ოპოზიციის ამომრჩეველთა (71%) უმრავლესობა.

რეგიონებში შეფასება უფრო მეტად გადახრილია კომისიის ლეგიტიმურობისკენ (40%).

ქართული ოცნების ამომრჩეველთა 70%-მდე ამ კომისიის საქმიანობას ლეგიტიმურად მიიჩნევს.

რაოდენობრივ კვლევაში, პირისპირი ინტერვიუს გზით, მონაწილეობას იღებდა საქართველოს სრულწლოვანი (+18) მოსახლეობის 2000 რესპონდენტი. რესპონდენტების შერჩევა ალბათურად (შემთხვევითობის პრინციპით) მოხდა, კერძოდ, წინასწარი სტრატიფიკაციის კლასტერული მეთოდით. შერჩევის ცდომილება ±2.2% მთლიანი შერჩევისთვის, 95%-იანი სანდოობით. საველე სამუშაოები ჩატარდა 2025 წლის 17-29 ივნისის შუალედში, 71%-იანი გამოპასუხების წილით. კვლევის დონორია სამოქალაქო საზოგადოების ფონდი, ხოლო განმახორციელებელი სოციალური კვლევისა და ანალიზის ინსტიტუტი (ISSA).