პარტია გახარია საქართველოსთვის წევრი დიმიტრი ცქიტიშვილი აჭარის მთავრობის ყოფილი თავმჯდომარის თორნიკე რიჟვაძის თვითმკვლელობის მცდელობას სოციალურ ქსელში ეხმაურება.

პოლიტიკოსი რიჟვაძეს გამოჯანმრთელებას უსურვებს. ის ეჭვქვეშ აყენებს თვითმკვლელობის ვერსიას და შემდეგი კითხვით მიმართავს გამოძიებას: რატომ დააჩქარეს აღნიშნული დასკვნის გამოტანა.

პირველ რიგში, ჯანმრთელობას ვუსურვებ თორნიკეს.

მთავარი კითხვა გამოძიებასთან: ორი ადამიანი იმყოფებოდა, როგორც ჩანს, ერთ სივრცეში, და ერთის იარაღით მეორე მძიმედაა დაჭრილი. რატომ წამოიწია ასე ნაჩქარევად თვითმკვლელობის ვერსია, თანმდევი პროპაგანდისტული ნარატივებით და არა სხვა შესაძლო სცენარები?

დღევანდელ ვითარებაში განსაკუთრებულად მნიშვნელოვანია ის, თუ რა ხდება დღეს ქვეყანაში.ჩვენს თვალწინ მიმდინარეობს რეჟიმის ტრანსფორმაციის პროცესი. ეგრეთ წოდებული, აქამდე მოქმედი ბალანსის სისტემიდან, რეჟიმი გადადის მკაცრად იერარქიულ ვერტიკალზე.

სახეზე გვაქვს სხვადასხვა სფეროზე და არალეგალური ფინანსური რესურსების მოძრაობაზე გავლენების გადანაწილების პროცესი ტრადიციულ მაფიოზურ სტილში.

მიმდინარეობს ეგრეთ წოდებული "საერთოს" (ობშიაკის) კონსოლიდაცია ერთ ხელში და ეს არანაირ კავშირში არ არის ნარკოტიკების უკანონო ბრუნვის ან და კორუფციის წინააღმდეგ ბრძოლასთან.

ყველა, ვინც აქამდე ჩართული იყო კორუფციაში თუ სხვა უკანონო საქმიანობაში, მანამდე დადგენილი უწესო წესების ფარგლებში მოქმედებდა, მაგრამ ყველაფრის მიუხედავად, მაინც ისჯებიან.

ასე რომ, რეჟიმის განახლებულ ვერტიკალთან კოლაბორაცია ისევე არ იძლევა არანაირ უსაფრთხოების გარანტიებს, როგორც აქამდე არსებულ სისტემაში ინტეგრაციამ ვერ დაიცვა ვერავინ.

ასე რომ კარგად დაფიქრდით, ვინც ამაზე ხელს აწერთ!!!

და კიდევ ერთი მნიშვნელოვანი ელემენტი: ასეთი ტრანსფორმაციული პროცესის დროს ნებისმიერი რეჟიმი — მათ შორის ქართული ოცნების რეჟიმიც — განსაკუთრებულად მოწყვლადია.

მაგრამ, მოწყვლადობის მიუხედავად, რეჟიმის დამარცხება მხოლოდ კოორდინირებული სტრატეგიით არის შესაძლებელი და არა ფრაგმენტირებული ქმედებებით. თუ რეჟიმმა ეს ეტაპი გადალახა, ის ჩამოყალიბდება გაცილებით უფრო ძლიერ და საშიშ მონსტრად, ვიდრე აქამდე იყო, — წერს დიმიტრი ცქიტიშვილი.

შსს-ს ცნობით, 2025 წლის 7 ივლისს, საგარეჯოს "ჯეოჰოსპიტალსში", შეყვანილი იქნა აჭარის ავტონომიური რესპუბლიკის მთავრობის ყოფილი თავმჯდომარე თორნიკე რიჟვაძე, რომელსაც გულმკერდის არეში ცეცხლნასროლი ჭრილობა აღენიშნებოდა.

"შინაგან საქმეთა სამინისტროში გამოძიება სისხლის სამართლის კოდექსის 115-ე მუხლით არის დაწყებული, რაც თვითმკვლელობამდე მიყვანას გულისხმობს. ფაქტთან დაკავშირებით მიმდინარეობს ინტენსიური საგამოძიებო მოქმედებები.

თორნიკე რიჟვაძეს ჩაუტარდა გადაუდებელი სამედიცინო დახმარება. ექიმების განმარტებით, მას ფილტვი აქვს დაზიანებული და მისი ჯანმრთელობის მდგომარეობა სტაბილურად მძიმეა.

ასევე, ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით, ბრალდებულის სახით ერთი პირია დაკავებული", — ნათქვამია უწყების მიერ გავრცელებულ ინფორმაციაში.

IPN-ის ცნობით, თორნიკე რიჟვაძის საქმეზე, ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით, ბრალდებულის სახით საზღვაო ტრანსპორტის სააგენტოს უფროსი ალექსი ახვლედიანი დაკავებული.