"სილქ როუდ ჯგუფისა" და "სილქნეტის" დამფუძნებელი, ბიზნესმენი გიორგი რამიშვილი, იგივე "ზარალა" მისმა ადვოკატმა, ირმა ჭკადუამ მოინახულა. უფლებადამცველი ამის შესახებ ინტერპრესნიუსს ესაუბრა და აღნიშნა, რომ გიორგი რამიშვილი მოგვიანებით განცხადებას თავად გააკეთებს.

"მოგვიანებით ბატონი გიორგი გააკეთებს განცხადებას და ყველა კითხვაზე გასცემს პასუხს, რომელიც მასმედიას აინტერესებს. სხვას ამ ეტაპზე, ვერაფერს გეტყვით," — განაცხადა ადვოკატმა.

ირმა ჭკადუას თქმით, რამიშვილის დაკავებას პოლიტიკასთან არანაირი კავშირი არ აქვს და მომხდარს "გაუთვალისწინებელ შეცდომას" უწოდებს.

"მოხდა ასეთი გაუთვალისწინებელი შეცდომა. დეტალებთან დაკავშირებით მოგვიანებით გავაკეთებთ ერთობლივ განცხადებას.

[დაკავებას] არაფერს არ უკავშირებს, რას უნდა უკავშირებდეს. არანაირი კავშირი პოლიტიკასთან ამ ფაქტს არ აქვს.

თქვენც ხვდებით ხო ალბათ, რომ პარიზში აეროპორტიდან არ შეიძლებოდა იარაღი წაეღო. აქ საუბარია შენახვის უფლებით რეგისტრირებულ კანონიერ იარაღზე. [...] როგორ მოხდა, რანაირად მოხდა ამასთან დაკავშირებით მისცემს ჩვენებას გამოძიებას და მოგვიანებით თქვენთვის იქნება ცნობილი". - ამბობს ჭკადუა.

ჟურნალისტის შეკითხვაზე - "ჩანთა შეეშალა?" ადვოკატმა ირმა ჭკადუამ უპასუხა, რომ "ფაქტია, დიახ, მსგავსი რამ მოხდა," — თქვა ირმა ჭკადუამ.

ცნობისთვის, "სილქ როუდ ჯგუფის", "სილქნეტის" და Euronews Georgia-ს დამფუძნებელი გიორგი რამიშვილი ("ზარალა") გუშინ დააკავეს.

შსს-ს ცნობით, გიორგი რამიშვილი სისხლის სამართლის კოდექსის 236-ე მუხლის მე-3 მე-4 ნაწილით დააკავეს, რაც ცეცხლსასროლი იარაღის მართლსაწინააღმდეგო შეძენა, შენახვა, ტარებას გულისხმობს. გავრცელებული ინფორმაციით, ის თბილისის საერთაშორისო აეროპორტში დააკავეს.

დანაშაული 6-დან 10 წლამდე პატიმრობას ითვალისწინებს.