მსახიობი და მუსიკოსი ვანიკო თარხნიშვილი მასზე განხორციელებული თავდასხმის გამო გამოკითხვაზე დაიბარეს. როგორც თავად ამბობს, ის უწყებაში საღამოს გამოცხადდება.

"გამომძიებელმა დამირეკა გუშინ, სტატუსი ვნახეთო და დამიბარეს. დღეს საღამოს მივალ და დანარჩენი ინფორმაცია არ მაქვს არაფერი. ვიდეოში ჩანს ყველაფერი თვითონვე, რომ გადაიღეს და დადეს" — აცხადებს მუსიკოსი.

ვანიკო თარხნიშვილს თავს გუშინ, 6 ივლისს დაესხნენ.

"სავარაუდოდ, იანვარში ფაბში "ოლე-ოლა" რომ ვიმღერე, ეს "დაქირავებულები" მეც დამხვდნენ სახლთან ბოლოს და ბოლოს" — დაწერა მსახიობმა სოციალურ ქსელში და ფოტო გამოაქვეყნა, რომელშიც ჩანს, რომ მას დაზიანებები აქვს მიყენებული.

შემთხვევა მისი მშობლების საცხოვრებელ სახლთან მოხდა. ვანიკო თარხნიშვილის თქმით, მას ორი პირი მიუახლოვდა, ჯერ ფანებად გაეცნენ, შემდეგ კი ცემაზე გადავიდნენ.

"იყო ალბათ ორი ადამიანი და მესამე იღებდა. არანაირი ნიღბებით არ იყვნენ, გამეცნენ, ვითომ შენი ფანი ვარო, დანარჩენები მერე დავინახე საერთოდ. შემდეგ მოულოდნელად დამესხა თავს. იანვარში სადღაც პაბში ვიმღერეთ ეს "ოლეოლა", რომელიც რატომღაც ძალიან აღიზიანებთ ამათ. მომაძახა, რომ რატომ გვაგინეო და მაგას ვაბრალებ აბა მეტი სხვა რას?! არავისთვის არაფერი არ მახსენდება დამეშავებინოს და მითუმეტეს გამემწარებინოს ასე — განაცხადა ვანიკო თარხნიშვილმა "TV პირველთან".