ბოლო 10 დღის განმავლობაში თურქეთში 761 ხანძარი დაფიქსირდა, რაც მთელი წლის ხანძრების დაახლოებით მეოთხედს შეადგენს. ინფორმაციას უცხოური მედია თურქეთის ხელისუფლებაზე დაყრდნობით ავრცელებს.

კვირა დღის მონაცემებით, ყველა ხანძარი ჩამქრალი ან კონტროლის ქვეშ იყო მოქცეული, მათ შორის 20 დიდი ხანძარი მოხდა იზმირის, საკარიას, ჰატაის, ბილეჩიკის, მანისის, სტამბოლისა და ბურსას პროვინციებში.

თურქეთის შინაგან საქმეთა მინისტრმა ალი იერლიკაიამ განაცხადა, რომ მხოლოდ იზმირში, სადაც ზარალის სრული მასშტაბის შეფასება ჯერ კიდევ მიმდინარეობს, ხანძარმა მინიმუმ 228 სახლი სერიოზულად დააზიანა. იზმირში ხანძარს საწოლს მიჯაჭვული 81 წლის კაცისა და ორი მაშველის სიცოცხლე ემსხვერპლა.

ბოლო დღეებში, თურქეთის სხვა ნაწილებიდან ათიათასობით ადამიანი იქნა ევაკუირებული. შინაგან საქმეთა მინისტრის განცხადებით, ადამიანები, რომლებმაც სახლები დაკარგეს, დროებით საცხოვრებლებში განთავსდებიან.