სოციალური კვლევისა და ანალიზის ინსტიტუტის (ISSA) ახალი კვლევით საქართველოს მოსახლეობის 59% "ნეტგაზეთისა" და "ბათუმელების" თანადამფუძნებლისა და დირექტორის, მზია ამაღლობელის დაკავებას უსამართლოდ მიიჩნევს.

კითხვაზე: მიგაჩნიათ თუ არა, რომ სამართლიანია ჟურნალისტ მზია ამაღლობელის წინააღმდეგ წარდგენილი ბრალდება, რომელიც სისხლის სამართლის პასუხისმგებლობას ითვალისწინებს, 4-დან 7 წლამდე პატიმრობით?

გამოკითხულთა 59% ბრალდებას უსამართლოდ მიიჩნევს, 22% — სამართლიანად, ხოლო 19% პოზიციას არ აფიქსირებს.

თბილისში, მათი რიცხვი ვინც თვლის, რომ ასეთი ბრალი და სასჯელი უსამართლოა 70%-ია, რეგიონებში — 54%.

ამავე კვლევის მიხედვით, ქართული ოცნების ამომრჩევლის 22% თვლის, რომ ამაღლობელისთვის წარდგენილი ბრალი (სილის გაწვნისთვის) უსამართლოა.

სოციალური კვლევისა და ანალიზის ინსტიტუტმა (ISSA) 2025 წლის ივნისში ჩაატარა სოციოლოგიური კვლევა, რომლის მიზანი იყო საქართველოს მოსახლეობის განწყობებისა და მოსაზრებების შესწავლა ქვეყანაში მიმდინარე პროცესებთან დაკავშირებით.