ნამახვანჰესის პროექტის ახალი დირექტორი, მერაბ ლომინაძე ამბობს, რომ კაშხლის მშენებლობა კვლევების ვერიფიკაციამდე შეჩერდა, თუმცა მოსამზადებელი სამუსაოები გრძელდება.

"რაც შეეხება იმას, რომ მშენებლობა შეჩერებულია, ჩვენ არ გვაქვს მშენებლობა შეჩერებული. მივყვებით იმ გეგმა-გრაფიკს, რომელიც არის კომპანიის მიერ შემუშავებული. სანამ არ იქნება დადასტურებული ის კვლევები, მანამ ძირითად ნაწილს, რომელიც შეეხება, მაგალითად კაშხალს, მშენებლობას არ დავიწყებთ. [...] ამ ეტაპზე ჩვენ გვაქვს მხოლოდ მოსამზადებელი სამუშაოები, ეს არ შეჩერებულა და არ შეჩერდება", — განაცხადა ლომინაძემ ჟურნალისტებთან.

მისივე თქმით, პროექტის დაწყებამდე კომპანიას ყველა კვლევა ჩატარებული აქვს, თუმცა სახეზეა კომუნიკაციის პრობლემა როგორც საზოგადოებასთან, ისე ადგილობრივებთან:

"ამ კითხვების პასუხების გასაცემად, კომპანია ENKA-მ ნორვეგიულ პარტნიორთან ერთად განაცხადეს სრული მზადყოფნა, რომ დამატებით განხორციელებულიყო კვლევები, რომელიც ამჟამად მიმდინარეობს. თუმცა აუცილებლობა ამ კვლევების არ არსებოდა".

როგორც ლომინაძე ამბობს, შეხვედრები ჩატარდება ყველა დაინტერესებულ პირთან, მათ შორის იმათთან, ვინც ზოგადად ჰესების აშენებას ეწინააღმდეგება.

პროექტთან დაკავშირებით კომპანია ENKA-მ შეხვედრა გამართა, რომელსაც მთავრობის წარმომადგენლები, თურქეთისა და ნორვეგიის ელჩები და ბიზნესასოციაციები ესწრებოდნენ.