პრემიერმინისტრის, ირაკლი ღარიბაშვილის აზრით, ნამახვანჰესის ირგვლივ დაწყებული "აჟიოტაჟი და ხმაური" არის აბსოლუტურად გაუგებარი. ამის შესახებ მან ჟურნალისტებთან განაცხადა.

"ნამახვანჰესი არის უაღრესად მნიშვნელოვანი პროექტი და ჰესი ჩვენი ქვეყნის ენერგოდამოუკიდებლობისთვის. ჩვენი ქართველი მეცინერების მიერ არის დამუშავებული, 30 წლის წინ და უფრო მეტიც, 40 წლის წინ არის შემუშავებული და დაწყებულია მუშაობა ნამახვანჰესზე. ის აჟიოტაჟი და ის ხმაური, რაც არის დაწყებული, აბსოლუტურად გაუგებარია.

მეორე მხრივ, იქ მოსახლეობა და მოქალაქეები, რომლებიც არიან გულწრფელად ჩართულნი ამ პროცესში, მინდა გავმიჯნო, ერთი მხრივ, გულწრფელად ჩართულნი მოქალაქეები ამ პროტესტში და მეორე მხრივ, ანგაჟირებული, ზოგი პოლიტიკურად ანგაჟირებული, ზოგიც უცხო სახელმწიფოების მიერ წახალისებული, ინპირირებული მოქალაქეები, რაც არის საგანგაშო", — თქვა მან.

მეოთხე თვეა ნამახვანის ჰესის აშენებას ეწინააღმდეგება ადგილობრივი მოსახლეობა. ისინი ხეობიდან კომპანიის გასვლასა და მშენებლობის შეჩერებას მოითხოვენ. ადგილობრივების პროტესტს მხარს უჭერს არასამთავრობო ორგანიზიაციათა ნაწილი. მათი განცხადებით, სახელმწიფომ ისე გასცა ჰესის მშენებლობის ნებართვა, რომ მშენებელ კომპანიას საჭირო კვლევები და დოკუმენტები არ ჰქონდა წარმოდგენილი. ამავე დროს, ქართულ ოცნებაში მიაჩნიათ, რომ ადგილობრივი მოსახლეობისთვის არაა ნაჩვენები ნამახვანჰესის სიკეთეები და მეტი კომუნიკაციაა საჭირო.

ნამახვანიჰესის კასკადის მშენებლობა მდინარე რიონზეა დაგეგმილი, რომელიც ორ ჰესს მოიცავს, ქვემო და ზემო ნამახვანჰესს. ორივე ჰესი ერთად 433 მგვტ სიმძლავრის უნდა იყოს. პროექტი 850 მილიონი აშშ დოლარის ღირებულებისაა და კასკადის ექსპლუატაციაში შესვლა 2025-2026 წელს არის დაგეგმილი. პროექტს თურქულიკომპანია ენკა რინიუებლზ ახორციელებს.

ადამიანის უფლებების სწავლებისა და მონიტორინგის ცენტრის (EMC) განცხადებით, ნამახვანჰესის ხელშეკრულებით მნიშვნელოვანი სახელმწიფო ინტერესები დათმობილია კერძო კომპანიის სასარგებლოდ. როგორც ორგანიზაციაში ამბობენ, პროექტს არათუ ვერ ექნება ის წვლილი ქვეყნის ენერგოუსაფრთხოებაში, რაზეც მთავრობა მიუთითებს, არამედ შეთანხმება ქვეყნის ბიუჯეტისთვის მძიმე და განუსაზღვრელ ფისკალურ ტვირთებს ითვალისწინებს.

EMC-ს პასუხად, ეკონომიკის სამინისტრო აცხადებს, რომ აღნიშნული დასკვნა სპეკულატიური და დილეტანტურია. გარდა ამისა, სამინისტრო ხაზს უსვამს, რომ აღნიშნული პროექტი ენერგოდამოუკიდებლობსკენ გადადგმული ნაბიჯია.

12 მარტს, ნათია თურნავამ განაცხადა, რომ არსებული კვლევების გადამოწმებამდე კაშხლისა და წყალსაცავის მშენებლობა არ დაიწყება. თუმცა ამბობს, რომ ეს გადაწყვეტილება მოსახლეობის ნდობის მოსაპოვებლად მიიღო და დარწმუნებულია, რომ ახალი აღმოჩენა არ იქნება.

ENKA-ს განცხადებით, ნამახვანჰესის პროექტის შესაბამისობას, არსებულ ადგილობრივ და საერთაშორისო გარემოსდაცვით და სოციალურ სტანდარტებთან, განიხილავს კომპანია "რამბოლი", როგორც დამოუკიდებელი კონსულტანტი.

მათივე თქმით, "რამბოლი" მაღალი რეპუტაციის მქონე მულტინაციონალური საკონსულტაციო კომპანიაა, რომელიც მოქმედებს პირველი კლასის საერთაშორისო ფინანსური ინსტიტუტის სახელით. ეს უკანასკნელი უზრუნველყოფს პროექტის ფინანსურ სტაბილურობას და ასევე გარანტიას იღებს ყველაზე მაღალ საერთაშორისო სტანდარტებთან შესაბამისობაზე, რომელიც ეხება, როგორც სოციალურ და გარემოსდაცვით მდგრადობას, ასევე უსაფრთხოებასა და ტექნიკურ გამართულობას.

გაიგეთ მეტი: