თბილისის მერის მოადგილის, ირაკლი ბენდელიანის განცხადებით, პირველი ამოცანაა, ფერდს, სადაც მეწყერი პროგრესირებს, ბუნებრივი მდგომარეობა დაუბრუნდეს. მისივე თქმით, წინაღობა გაკეთდება და ეს იქნება დროებითი. ამის შემდეგ მოეწყობა უსაფრთხო მისასვლელი გზები უშუალოდ მეწყრულ ადგილზე. შემდეგში მოხდება გარკვეულ უბნებზე მიწის მასების მოჭრა და გატანა. ის, ასევე, ამბობს, რომ ტერასული ტიპის გარკვეული სამუშაოები უნდა განხორციელდეს.

"პირველი ამოცანაა ამ ფერდს, ბუნებრივი მდგომარეობა დავუბრუნოთ... მნიშვნელოვანია, მოხდეს დაანკერება, რაც ნიშნავს, რომ ეს მცოცავი ფერდის მოძრაობის შეჩერება სხვა ღონისძიებებთან ერთად მოხდეს ანკერული პრინციპით. ეს მეთოდი არ არის ჩვენ მიერ მოგონილი, აპრობირებული მეთოდია, თბილისშიცაა გამოყენებული, წყნეთი-ბეთანიის მეწყრის დროს და ა.შ." — ამბობს ბენდელიანი და ამატებს, რომ "არასერიოზულია" იმის თქმა, რა დრო დასჭირდება ამ ღონისძიებებს.

ბენდელიანის განცხადებით, გელოვანი-ვაშლიჯვრის დამაკავშირებელი გზის მშენებლობის პროექტით გათვალისწინებული სამუშაოები ამ ეტაპზე მხოლოდ უსაფრთხო ზონაში — გელოვანის ნაწილში გრძელდება. მისივე თქმით, მაჭავარიანის ქუჩაზე მოძრაობის აღდგენა შესაძლებელი იქნება მხოლოდ საფრთხეების საბოლოოდ ლიკვიდაციის შემდეგ.

რაც შეეხება მეწყრული პროცესების საფრთხეებიდან გამომდინარე მოსახლეობის ევაკუაციის საჭიროებას, ირაკლი ბენდელიანის განმარტებით, ამ ეტაპზე ამის საშიშროება არ არსებობს. მისივე თქმით, მეწყრის ზონაში მიმდინარე ყოველდღიური მონიტორინგის პარალელურად, ერთ კვირაში, დამატებითი, აპრობირებული თანამედროვე მონიტორინგის სისტემა დამონტაჟდება.

ვაშლიჯვარში მეწყრულ ფერდზე გარკვეული სამუშაოების დაწყების გადაწყვეტილება მიიღეს. როგორც თბილისის მერიის მოადგილე ამბობს, უცხოელი ექსპერტების ზედამხედველობით სამუშაოები უახლოეს დღეებში დაიწყება.

17 მარტს ფორუმზე გავრცელდა ფოტოები, სადაც ჩანს, რომ ვაშლიჯვრისა და ნუცუბიძის დამაკავშირებელი გზის ფერდობზე ნაპრალები გაჩნდა. ფოტოების გავრცელებამდე, დილით, თბილისის მერმა, კახა კალაძემ განაცხადა, რომ მაჭავარიანის ქუჩაზე მეწყრული პროცესების გააქტიურების გამო ტრანსპორტის მოძრაობა ორმხრივად შეიზღუდებოდა. კალაძეს არ უთქვამს ზუსტად როდის დაიწყო ეს პროცესები, თუმცა აღნიშნა, რომ დამეწყრილი უბნის შესწავლაში მერიის სამსახურებთან ერთად, შესაბამისი უწყებების სპეციალისტები უკვე ჩართულნი იყვნენ.