შერიგებისა და სამოქალაქო თანასწორობის საკითხებში სახელმწიფო მინისტრის, თეა ახვლედიანის განცხადებით, მოსაზრება, რომ სოხუმი არის მზად დიალოგისთვის და თბილისი არ პასუხობს, მცდარია.

"ეს არის მცდარი. უმაღლეს დონეზე მრავალჯერ, ზუსტად იმავე საჯარო სივრცეში და ზუსტად იმავე გზით, არაერთხელ გავეცით პასუხი. არაერთხელ განვაცხადეთ, რომ მზად ვართ ამ დიალოგისთვის დეპოლიტიზირებულ თემებზე, ორივე საზოგადოების საერთო ინტერესებში შემავალ საკითხებზე, ნებისმიერ დროს, ნებისმიერ ადგილას, ნებისმიერ დონეზე", — განაცხადა მინისტრმა.

მისივე თქმით, საქართველოს ხელისუფლებას არ შეუწყვეტია დიალოგი აფხაზებთან და ამას გარკვეული შედეგებიც ჰქონდა.

"საქართველოს ხელისუფლებას არასდროს შეუწყვეტია დიალოგი აფხაზებთან და ამ შედეგებს აქვს კონკეტული სახელი. ხშირ შემთხვევაში არაფორმალურ კომუნიკაციას და დიალოგს მოჰქონდა გადამწყვეტი შედეგი. გვახსოვს ასევე, რომ აფხაზეთის ყოფილი დეფაქტო ხელისუფლების წარმომადგენლებისგანაც, არაერთხელ გაჟღერდა მსგავსი დიალოგის მზაობა. თუმცა, მათ შედეგი არ მოჰყოლიათ", — თქვა მან.

მინისტრის თქმით, საქართველოს ხელისუფლება არის მზად, რომ კონკრეტული გზებით განიხილონ როგორ შეიძლება ისეთი დიალოგი აწარმოონ, რომელიც ჩაითვლება დიალოგად.