გალის რაიონიდან გადმოსული გალელი ექთნის საკარანტინე სივრცეში გარდაცვალებაზე ჯანდაცვის სამინისტრო აცხადებს, რომ ენგურის ხიდზე ჩატარებული სამედიცინო ღონისძიების შედეგად პაციენტის მდგომარეობა დამაკმაყოფილებლად შეფასდა. უწყებაში ამბობენ, რომ ქალი აფხაზეთის ოკუპირებული ტერიტორიიდან სამედიცინო ტრანსპორტით გადმოიყვანეს.

"პაციენტის ჯანმრთელობის მდგომარეობა ადგილზევე შეფასდა, ჩაუტარდა ელ. კარდიოგრაფია და მოხდა მისი სასიცოცხლო პარამეტრების განსაზღვრა. ჩატარებული სამედიცინო ღონისძიების შედეგად პაციენტის მდგომარეობა შეფასდა დამაკმაყოფილებლად. სასწრაფო სამედიცინო დახმარების ბრიგადის მიერ ჰოსპიტალიზაცია საჭიროდ არ ჩაითვალა, ვინაიდან რაიმე სახის ჩივილი არ იკვეთებოდა",, — აცხადებენ უწყებაში.

მათივე თქმით, ქალბატონი, დადგენილი წესით, საკარანტინე სივრცეში სასტუმრო ანაკლიაში მოთავსდა.

"პაციენტის საკარანტინე სივრცეში მოთავსებიდან რამდენიმე საათში, ექიმის მიერ სასწრაფო სამედიცინო დახმარების გამოძახება მოხდა. ადგილზე მისულ ბრიგადას ქალბატონი გარდაცვლილი დახვდა", — განმარტავენ სამინისტროში.

გალელი ექთანი, რომელმაც გულის უკმარისობის ჩივილებით ენგურის ხიდი გადმოკვეთა, ანაკლიის საკარანტინე სივრცეში 16 მარტს გარდაიცვალა. საზოგადოებრივი ჯანდაცვის ცენტრში On.ge-ს უთხრეს, რომ გარდაცვლილის ცხედარი ექსპერტიზაზეა გადასვენებული.

გალის რაიონის მკვიდრი, ნინო რიგვავა On.ge-სთან ყვება, რომ ქართულმა პოლიციამ პირველადი დახმარების ნაცვლად ქალი კარანტინში გაამწესა.

"ავად იყო ქალი, მიჰქონდა საბუთი და პირდაპირ გაუშვეს ანაკლიაში. კიდევ ერთი მსხვერპლი ქართული პოლიტიკის დაუდევრობის. ბედის ანაბარა მიგვატოვეს, როდემდე უნდა ვიყოთ ასე", — ამბობს სოფელ ოქუმში მცხოვრები, ნინო რიგვავა On.ge-სთან.

წელიწადზე მეტია გალის რაიონის მცხოვრებლებს ცენტრალური ხელისუფლების მიერ კონტროლირებად ტერიტორიაზე თავისუფლად გადაადგილების შესაძლებლობა არ აქვთ.

საქართველოს უსაფრთხოების სამსახურში 11 თებერვალს განაცხადეს, რომ ოკუპირებული აფხაზეთის მიმართულებით გადაადგილება 12 თებერვლის დღის პირველი ნახევრიდან ორმხრივად ხანდაზმულებისთვის, პენსიონერებისთვის, განსაკუთრებული საჭიროების მქონე პირებისთვის და სხვა კატეგორიის ადამიანებისთვის გაიხსნებოდა.

ამ განცხადებიდან რამდენიმე საათში შერიგებისა და სამოქალაქო თანასწორობის საკითხებში სახელმწიფო მინისტრმა, თეა ახვლედიანმა განმარტა, რომ პირველ თებერვლამდე საკარანტინე ვადა 12-დღიანი იყო, ხოლო 11 თებერვლიდან ოკუპირებული რეგიონებიდან გადმომსვლელთათვის ის 5-დღიანი გახდებოდა.

როგორც ახვლედიანმა აღნიშნა, მათ სივრცის დატოვება PCR ტესტირების უარყოფითი შედეგისა და საკარანტინე ვადის ამოწურვის შემდეგ აქვთ.

საქართველოს მთავრობის მიერ გამოცხადებული გადაადგილების თავისუფლებაზე შეზღუდვის მოხსნით, სინამდვილეში გალის რაიონის მცხოვრებლებისთვის არაფერი შეცვლილა. ადგილობრივები ჩივიან, რომ კარანტინის არსებობა მათ დამატებით შეფერხებებს უქმნით და გადმოსვლის იდეას აზრს უკარგავს. ამიტომ ისინი სავალდებულო კარანტინის დაუყოვნებლივ მოხსნას ითხოვენ.