პარლამენტის დეპუტატი, ფრაქცია ქართული ოცნება - სოციალ-დემოკრატების თავმჯდომარე, გია ჟორჟოლიანი 2016 წლის მოწვევის პარლამენტში საპარლამენტო სესიას ჯერ არ დასწრებია. საქართველოს პარლამენტიდან მიღებული საჯარო ინფორმაციის მიხედვით, ის ერთადერთი დეპუტატია მეცხრე მოწვევის პარლამენტში, რომელიც ახალი მოწვევის პარლამენტის სესიებს არ დასწრებია.

ჟორჟოლიანმა მეცხრე მოწვევის პარლამენტში მისი უფლებამოსილების დაწყებიდან - 2016 წლის 18 ნოემბრიდან - 31 დეკემბრის ჩათვლით 6 938 ლარი გამოიმუშავა. ამ თანხიდან თანამდებობრივი სარგო 2 762 ლარი, სადეპუტატო უფლებამოსილების განხორციელების თანხა კი - 4 176 ლარი იყო.

On.ge დაინტერესდა, რა მიზეზით არ ესწრებოდა ჟორჟოლიანი სხდომებს და მას დაუკავშირდა.

"სესიაზე ჯერ არ ვყოფილვარ, ცუდად ვიყავი. ჯერ საზღვარგარეთ ვიყავი, ოპერაცია გავიკეთე, მერე ჩამოვედი," - განაცხადა ჟორჟოლიანმა, რომელის თქმითაც, ბიულეტენი ჰქონდა აღებული. ჟორჟოლიანის თქმით, ის არც 2017 წელს გამართულ სხდომებს დასწრებია.

მართალია, ჟორჟოლიანი საპარლამენტო სესიებს არ დასწრებია, თუმცა, მან საზოგადოებას თავისი ინიციატივების შესახებ მედიის საშუალებით გააცნო. გია ჟორჟოლიანის და პარტია სოციალ-დემოკრატების საკონსტიტუციო ინიციატივა გულისხმობს საკონსტიტუციო ჩანაწერის ამოღებას, რომელიც ახალი გადასახადის დაწესებას, ან გადასახადის გაზრდას მხოლოდ რეფერენდუმის მეშვეობით ხდის შესაძლებელს.