საკონსტიტუციო კომისია კონსტიტუციაში საზოგადოებრივი მაუწყებლის შესახებ ჩანაწერის გაკეთებაზე იმსჯელებს.

ინიციატივა არასამთავრობო ორგანიზაციებსა და ექსპერტებს ეკუთვნის. ერთ-ერთი ინიციატორის, კონსტიტუციონალისტ ვახუშტი მენაბდის განცხადებით, კონსტიტუციურ დონეზე უნდა განისაზღვროს საზოგადოებრივი მაუწყებლის დამოუკიდებლობა სახელმწიფო და კომერციული გავლენებისგან:

"კონსტიტუციურ დონეზე უნდა იყოს საქართველოს მოქალაქეთა უფლება გარანტირებული, რომ ჰქონდეთ საზოგადოებრივი მაუწყებელი, რომელიც თავისუფალი იქნება სახელმწიფო და კომერციული გავლენებისგან და რომელიც დააკმაყოფილებს კულტურულ, სოციალურ და პოლიტიკურ ინტერესს, მიუხედავად იმისა, თუ რა ზომის ჯგუფს აწუხებს ის, ვისთვის არის მისი გაშუქება მისაღები და ვისთვის მიუღებელი."

ინიციატივას არ ეთანხმებიან საპარლამენტო უმრავლესობასა და ოპოზიციაში. ქართული ოცნების დეპუტატის, სოფო კილაძის თქმით, საზოგადოებრივი მაუწყებელი და ზოგადად მედია ისედაც დამოუკიდებელია და კონსტიტუციაში ჩანაწერის გაკეთება არ არის საჭირო:

"რამდენად მიზანშეწონილი არის, რომ გამოვყოთ მხოლოდ საზოგადოებრივი მაუწყებელი, სამართლებრივად და დოგმატურად იურიდიული კუთხით თუ მივუდგებით, მე არ ვფიქრობ, რომ ეს ლოგიკური იყოს იმიტომ, რომ ისედაც დამოუკიდებელი არის."

რაც შეეხება ოპოზიციას, ფრაქცია ევროპული საქართველოს წევრი, გიორგი ტუღუში ამბობს, რომ საზოგადოებრივი მაუწყებლის პრობლემები კონსტიტუციით ვერ მოგვარდება და სხვა მიდგომაა საჭირო.