აუდიტის ანგარიშის თანახმად, ყაზბეგის მუნიციპალიტეტის სოფლებში საბავშვო ბაღების მშენებლობისთვისა და რემონტისთვის 235 ათას ლარამდე დაიხარჯა, თუმცა სამუშაოები უხარისხოდ შესრულდა. ამის შესახებ მუნიციპალიტეტის 2018-2019 წლების საქმიანობის შესაბამისობის აუდიტშია საუბარი.

დოკუმენტის მიხედვით, ყაზბეგის მუნიციპალიტეტმა სოფელ ყანობში საბავშვო ბაღისთვის 189,7 ათასი ლარის სამშენებლო სამუშაოები შეისყიდა.

ანგარიშში აღნიშნულია, რომ სამუშაოების ვადაში დასრულების მიზნით მიმწოდებელი კომპანია ახლადგალესილი კედლების სათანადოდ გაშრობას არ დაელოდა და შემდეგი სამუშაოები განახორციელა, რის შედეგად პროექტის უხარისხოდ შესრულდა. კერძოდ, შენობის კედლები ძლიერ დანესტიანებულია, რის გამოც ჭერი და კედლები დაზიანებულია და ჩამოცვენილია საღებავი.

აუდიტის ანგარიშში ვკითხულობთ კიდევ ერთი საბავშვო ბაღის უხარისხო სარემონტო სამუშაოებზე. კერძოდ, სოფელ არშის ბაღის რემონტზე 45,1 ათასი ლარი დაიხარჯა, თუმცა კედლები და ჭერი დაზიანებულია, ხოლო ოთახებში ჩამოცვენილია შპალერი და საღებავი.