მოგზაური და ბლოგერი მეთ კესტერნი ანტარქტიდაზე იმყოფებოდა, როცა საინტერესო სანახაობის მომსწრე გახდა. მის მიერ გადაღებულ ვიდეოში ჩანს, როგორ უსხლტება მოხერხებული პინგვინი მკვლელ ვეშაპებს.

ტურისტებით სავსე რამდენიმე კანჯო გერლახის სრუტეში დაცურავდა, როცა ანტარქტიკის სტუმრებმა არცთუ კეთილგანწყობილი და მოშიებული მასპინძლები შენიშნეს — მეთის კამერაში ისიც კი ჩანს, რომ მკვლელი ვეშაპები მეტად ცნობისმოყვარენი არიან.

თუმცა, ცნობისმოყვარეობასა და შიმშილს შორის ყოველთვის ამ უკანასკნელის სასარგებლოდ კეთდება ხოლმე არჩევანი და არც ეს შემთხვევა აღმოჩნდა გამონაკლისი. ვეშაპების ყურადღება მალევე მიიპყრო მარტო მოცურავე პინგვინმა და ისინიც წახემსებისთვის მოემზადნენ.

მაგრამ, კოვზი ნაცარში თუ არა, ოკეანის ფსკერზე ნამდვილად ჩაუვარდათ. პინგვინმა სწრაფად შენიშნა მოახლებული საფრთხე და გაქცევა სცადა. სანამ გარშემო ტურისტები შეძახილებით ამხნევებდნენ, მან ჯერ ნავების გარშემო ატრიალა ვეშაპები, შემდეგ კი პირდაპირ კანჯოზე ისკუპა. შეუპოვარი ფრინველი წარუმატებელ პირველ მცდელობას არ შეუშინდა და მეორეჯერაც გადახტა ნავისკენ. ამჯერად, მოახერხა და, საბოლოოდ, მაინც დაიძვრინა თავი მკვლელი ვეშაპებისგან. გულშემატკივრები ნავზე მას ოვაციებით შეხვდნენ.

ვეშაპებმა იმ ნავს, სადაც საკბილო იმყოფებოდა, კარგა ხანს სდიეს, თუმცა, ბოლოს ფარფლი ჩაიქნიეს და მარჯვე პინგვინი ახალ მეგობრებთან დატოვეს.