აშშ-ს ყოფილი ელჩი საქართველოში, უილიამ კორტნი აცხადებს, რომ ნაციონალური მოძრაობის თავმჯდომარის, ნიკა მელიას დაკავებამ დასავლეთში შოკი გამოიწვია. ამის შესახებ კორტნიმ ფორმულასთან ინტერვიუში ისაუბრა. მისი თქმით, მელიას დაკავება ერთ-ერთია იმ იმედგაცრუებებს შორის, რომელიც ჰქონდა დასავლეთს, საქართველოში ბოლო დროს განვითარებულ მოვლენებთან დაკავშირებით.

"დასავლეთში ბოლო დროს რამდენიმე საკითხზე იყო იმედგაცრუება საქართველოში პოლიტიკური მოვლენების განვითარებასთან დაკავშირებით. მათ შორისაა არჩევნები, რომელიც არ იყო თავისუფალი და სამართლიანი. ასევე, ოპოზიციის უარი, დაეკავებინა ადგილი პარლამენტში. დღეს კი განსაკუთრებული იმედგაცრუება გამოიწვია ოპოზიციის ლიდერის, ნიკა მელიას დაკავებამ. ეს არის ძალიან ანტიდემოკრატიული ნაბიჯი, რომელმაც დასავლეთში შოკი გამოიწვია", — განაცხადა კორტნიმ.

ჟურნალისტის კითხვაზე, რა არის გამოსავალი შექმნილი ვითარებიდან, კორტნი პირდაპირ პასუხობს — მელის გათავისუფლება და ოპოზიციის შესვლა პარლამენტში.

"პირველი, მელია უნდა გათავისუფლდეს. მეორე, ოპოზიციამ უნდა დაიკავოს საკუთარი ადგილი პარლამენტში. შესაძლოა საკმაოდ რთულია მმართველ პარტიასა და ოპოზიციას შორის ერთობლივი მუშაობა ახალი იდეების შესამუშავებლად. დემოკრატიის ქვეყნებში გამოჩენილი მოქალაქეები ერთად სხდებიან და გამოდიან კონკრეტული იდეებით. ვფიქრობ, ახლა საქართველოში სწორედ ამის დროა", — ამბობს ყოფილი ელჩი.

რაც შეეხება ზოგად შეფასებას საქართველოში პოლიტიკური პროცესების გაჯანსაღებასთან დაკავშირებით, უილიამ კორტნი ამბობს, რომ მნიშვნელოვანია ადამიანები ერთიანდებოდნენ არა პიროვნებების, არამედ იდეების გარშემო.

"ქართული პოლიტიკისთვის მნიშვნელოვნია, შეძლებისდაგვარად გასცდეს პერსონალიებს, ივანიშვილისა და სააკაშვილის ჩათვლით. პოლიტიკური პარტიები უნდა განვითარდეს და ეფუძნებოდეს ინტერესებს. ის შეიძლება იყოს კონსერვატიული, ლიბერალური, პროდასავლური, პრორუსული და ა.შ. მაგრამ, იდეებმა უნდა მოახდინოს მისი საფუძვლის ფორმირება", — განაცხადა მან.

აშშ-ს ყოფილი ელჩი საქართველოში ამბობს, რომ საქართველოს წინააღმდეგ სანქციების გატარება არ იქნება სწორი.

"სანქციებს იყენებენ იმ ქვეყნების წინააღმდეგ, რომლებიც ჩართულები არიან სასტიკ ქმედებებში. მაგალითად, ირანის, ან რუსეთის წინააღმდეგ გარკვეული ასპექტით. შეერთებული შტატები არ იყენებს სანქციებს მეგობრების წინააღმდეგ. საქართველო ჯერ კიდევ შეერთებული შტატების ახლო მეგობარია. ამერიკაშიც და ზოგადად, დასავლეთში, დარწმუნებულები არიან, რომ სამოქალაქო საზოგადოება საქართველოში ძლიერია, უფრო განვითარდება და ქვეყანა დაუბრუნდება დემოკრატიის გზას. სანქციების დაწესება ამ ეტაპზე არ იქნება სწორი", — ამბობს ის.

უილიამ კორტნი იყო აშშ-ს ელჩი საქართველოში 1995-1997 წლებში.

გაიგეთ მეტი: