ცნობილი ანიმაციური სერიალის რიკი და მორტი ერთ-ერთმა სცენარისტმა, ალექს რუბენსმა დაადასტურა, რომ მეშვიდე სეზონზე მუშაობა დაიწყეს.

ამის შესახებ ინფორმაცია მან ტვიტერის პირად ანგარიშზე გაავრცელა: "შემიძლია იმის თქმა, რომ მეშვიდე სეზონის სცენარის წერა დავიწყეთ? (თუ არ შემიძლია, არც არაფერი მითქვამს)".

რიკი და მორტის ერთგული ფანებისთვის სასიამოვნო სიახლეა, რომ შოუს შექმნაზე მუშაობა აქტიურად გრძელდება, მაგრამ ახლა, ალბათ, ყველას ის უფრო აინტერესებს, თუ რა ხდება მეხუთე სეზონთან დაკავშირებით.

მეოთხე სეზონის ბოლო ეპიზოდი 2020 წლის მაისში გამოვიდა და მას შემდეგ მაყურებლები ახალ სეზონს მოუთმენლად ელოდებიან.

ფოტო: Giphy

რამდენიმე თვის წინ ამ ანიმაციური სერიალის ერთ-ერთმა შემოქმედმა, დენ ჰარმონმა განაცხადა, რომ პანდემია მათ დაეხმარა, უფრო კონცენტრირებულიყვნენ საქმეზე, ამიტომაც მეხუთე სეზონი იმაზე მალე იქნება მზად, ვიდრე გეგმავდნენ.

თუმცა როდისაა ეს მალე, ჯერ კიდევ უცნობია.

მანამდე იმასაც დაგვპირდნენ, რომ ის დაშორება, რომელიც მესამე და მეოთხე სეზონებს შორის იყო (2017-დან 2019 წლამდე), ყველაზე გრძელი იყო და მსგავსი რამ აღარ განმეორდებაო.

ამიტომ, ისღა დაგვრჩენია, დაველოდოთ. თანაც დარწმუნებულები ვართ, რომ კვლავ დაუვიწყარ სანახაობას შემოგვთავაზებენ.