ბოლო პერიოდში დასავლურ კინო და სატელევიზიო ინდუსტრიას ადამიანების გარკვეული ნაწილი ხშირად აკრიტიკებს იმის გამო, რომ ცნობილი ლიტერატურული პერსონაჟების, კომიქსის გმირებისა თუ ისტორიული ფიგურების როლზე, რომელთაც მანამდე როგორც თეთრკანიანს, ისე წარმოიდგენდნენ, შავკანიან მსახიობებს ამტკიცებენ.

მსგავსი მოსაზრებების მქონე ჯგუფები ამტკიცებენ, რომ თუნდაც მხატვრულ ნაწარმოებში აუცილებლად უნდა იყოს შენარჩუნებული "რასობრივი სიზუსტე", რადგან სხვაგვარი ინტერპრეტაციები ხელოვნური და ყალბია.

ხელოვნების ევროპულ და ამერიკულ ინდუსტრიებს, განსაკუთრებით კი ჰოლივუდს, საუკუნოვანი ისტორია აქვს თეთრკანიანი მსახიობების მიერ არათეთრკანიანი პერსონაჟების განსახიერებისა: ისეთ შემთხვევებშიც კი, როცა კონკრეტული გმირის ისტორია მკვეთრადაა დაკავშირებული მის რასობრივ თუ ეთნიკურ წარმომავლობასთან (აზიური, არაბული, აფრიკული და ა.შ. ფესვებით), მაინც თეთრკანიან (ევროპელ და ჩრდილოამერიკელ) მსახიობებს ამტკიცებდნენ ასეთ როლებზე.

ყურადსაღებია, რომ ზემოთ ხსენებული ადამიანებისთვის, რომლებსაც არათეთრკანიანი მსახიობების გარკვეულ როლებში ხილვა აწუხებთ, ეს ფაქტები ხშირად უხილავია. ყოველ შემთხვევაში, მათზე ისე გაცხარებული არ საუბრობენ, როგორც სხვა დროს.

არადა ეს ინფორმაცია უცნობი და ახალი სულაც არ არის: ვიკიპედიაზეც კი არსებობს ამ ფაქტების ჩამონათვალი და ახლა სწორედ მათგან რამდენიმე თვალსაჩინო შემთხვევას მოვიყვანთ მაგალითად.

განახლება: თავდაპირველ სიაში იყო ელიზაბეტ ტეილორის მიერ კლეოპატრას შესრულების მაგალითიც, თუმცა რადგანაც ეგვიპტის დედოფლის წარმომავლობა დღემდე განხილვის საგანია, საჭიროდ ჩავთვალეთ, რომ ჩამონათვალიდან ამოგვეღო.

1. მიკი რუნი აზიელი მეზობლის როლით ფილმში საუზმე ტიფანისთან (Breakfast at Tiffany's, 1961 წელი)

ცნობილმა ამერიკელმა მსახიობმა სათვალე და ხელოვნური კბილები გამოიყენა, რომ აზიელი ბიზნესმენის კარიკატურული სახე შეექმნა.

2. ალეკ გინესი არაბი პრინცის როლით ფილმში ლოურენს არაბი (Lawrence of Arabia, 1962 წელი)

ინგლისელმა მსახიობმა ერაყელი ისტორიული ფიგურა განასახიერა.

3. ანჯელინა ჯოლი მარიან პერლის როლით ფილმში ძლიერი გული (A Mighty Heart, 2007 წელი)

მარიან პერლი აფრიკული და კუბური წარმოშობის ფრანგი ქალია.

4. ჯეიკ ჯილენჰოლი ფილმში სპარსეთის პრინცი (Prince of Persia, 2010 წელი)

ფილმის სათაურიც პირდაპირ მიგვანიშნებს, თუ სადაური წარმოშობის პროტაგონისტზე მოგვითხრობს ის, თუმცა მთავარ გმირთან ერთად თითქმის სხვა ყველა როლსაც თეთრკანიანი მსახიობები განასახიერებენ.

5. ჯონი დეპი ტონტოს როლით ფილმში მარტოხელა რეინჯერი (The Lone Ranger, 2013 წელი)

ტონტო აბორიგენი ამერიკული ტომის – კომანჩების წარმომადგენელია. მართალია, ჯონი დეპი ამტკიცებდა, რომ მის წინაპართა შორისაც იყო ამერიკის აბორიგენი მოსახლეობის წარმომადგენელი, მაგრამ მის ამ როლზე შერჩევას ბევრი მაინც კრიტიკულად შეხვდა.

6. კრისტიან ბეილი მოსეს როლით ფილმში გამოსვლა: ღმერთები და მეფეები (Exodus: Gods and Kings, 2014 წელი)

და ის ერთადერთი არ არის: არაევროპული წარმოშობის ბიბლიური პერსონაჟები ამ კინოსურათში უმეტესად სულ სხვა ეთნიკური წარმომავლობის მქონე მსახიობებმა განასახიერეს.

7. რუნი მარა თაიგერ ლილის როლით ფილმში პენი (Pan, 2015 წელი)

თაიგერ ლილის პერსონაჟი აბორიგენი ამერიკელია.

8. ემა სტოუნი ელისონის როლით ფილმში ალოჰა (Aloha, 2015 წელი)

კაპიტანი ელისონის პერსონაჟი ნახევრად ჩინელი, ნახევრად კი ჰავაიელია. მოგვიანებით ამ როლზე ემა სტოუნის შერჩევის გამო ფილმის რეჟისორმა ბოდიში მოიხადა.

9. ტილდა სუინტონი ფილმში დოქტორი სტრეინჯი (Doctor Strange, 2016 წელი)

კომიქსის პირველწყაროს მიხედვით, ტილდა სუინტონის პერსონაჟი აზიელი კაცია.

10. სკარლეტ იოჰანსონი მირა კილიანის / მოტოკო კუსანაგის როლით ფილმში ჯავშნიანი მოჩვენება (Ghost in the Shell, 2017 წელი)

ეს ფილმი საკულტო მანგის მიხედვითაა გადაღებული, რომელიც მთლიანად იაპონელი პერსონაჟებითაა შექმნილი.