საქართველოს საზოგადოებრივი მაუწყებლის სამეურვეო საბჭოს განცხადებით, უახლოეს დღეებში საბჭო მოიწვევს საჯარო სხდომას, სადაც მოისმენს დამატებით ინფორმაციასა და განმარტებებს გენერალური დირექტორისგან და აღმასრულებელი საბჭოსგან.

მათივე გეგმით, ამ სხდომის შემდეგ სამეურვეო საბჭო დაგეგმავს შემდეგი კონსულტაციებისა და შეხვედრების ფორმატს, ხოლო, უახლოეს მომავალში დაიწყებს და დაგეგმავს შეხვედრებს მაუწყებლის თანამშრომლებთან და არასამთავრობო ორგანიზაციებთან.

საბჭოს განცხადებით, ეს არ არის "ორი დღის, სამი დღის, ერთი კვირის ან ორი კვირის საკითხი", არამედ, ეს არის ურთულესი თემა, რომელიც დაკავშირებულია სხვადასხვა პრობლემასთან.

სამეურვეო საბჭოს ერთ-ერთი წევრის ირინა ფუტკარაძის განმარტებით, დღეს კონკრეტულად გეგმის მოწონება/არმოწონებაზე პასუხი არ აქვთ და ყველაფერი საჯაროდ განხილვის შემდეგ გადაწყდება:

"მიუხედავად იმისა, რომ გენერალურმა დირექტორმა დღეს საჯაროს წარმოადგინა ეს გეგმა ეს სულაც არ ნიშნავს იმას, რომ ეს ხედვა იქნება გაზიარებული, როგორც ეს აღვნიშნეთ, ეს იქნება საზოგადოების ჩართულობით და შეიძლება მივიღოთ სულ სხვა ტიპის კონცეფცია. გენერალური დირექტორის ახალი გეგმა შეიძლება მივიღოთ, შეიძლება რეფორმის სულ სხვა ჭრილში დავინახოთ ეს ყველაფერი და მივიღოთ სულ სხვა ვარიანტი".

დღეს სამეურვეო საბჭოს სახელზე გენერალური დირექტორისგან შემოვიდა ორი საკითხი პირველი საზოგადოებრივი მაუწყებლის დებულებაში განსახორციელებელი ცვლილებების პროექტი და მეორე საზოგადოებრივი მაუწყებლის განვითარების სამწლიანი გეგმა.