ოპოზიციონერი ლიდერის, სვეტლანა ტიხანოვსკაიას ინიციატივით, 7 თებერვალს ბელარუსის სოლიდარობის საერთაშორისო დღე აღინიშნება.

ტიხანოვსკაიამ მსოფლიო ლიდერებსა და აქტივისტებს მოუწოდა, მონაწილეობა მიიღონ ბელარუსი ხალხის მხარდამჭერ ღონისძიებებში, რომლებიც უკვე რამდენიმე თვეა ალექსანდრე ლუკაშენკოს რეჟიმს ებრძვიან.

სხვადასხვა ქვეყანაში საპროტესტო აქციები იმართება. ამასთან, გაიმართა ონლაინკონფერენცია, რომელშიც ბელარუსი ოპოზიციონერები იღებდნენ მონაწილეობას.

ბელარუსს თავის მხარდაჭერას უცხადებენ ბალტიისპირეთის ქვეყნები. ლიეტუვის, ლატვიისა და ესტონეთის საგარეო საქმეთა სამინისტროების ერთობლივ განცხადებაში აღნიშნულია, რომ ისინი აღფრთოვანებული არიან ბელარუსი ხალხის ბრძოლითა და გამბედაობით.

"ბელარუსში ვითარება უარესდება. ხელისუფლების სასტიკი მოპყრობა მშვიდობიანი დემონსტრანტების მიმართ კვლავ გრძელდება", — აღნიშნულია განცხადებაში და კვლავ მოუწოდებენ ბელარუსის მთავრობას, გაათავისუფლონ დაკავებულები.

სოლიდარობის მიზნით კი ლიეტუვა, ლატვია და ესტონეთი საზოგადოებრივ შენობებს ბელარუსის დროშის ფერებში — წითლად და თეთრად გაანათებენ.

ბელარუსის პროტესტის სიმბოლოდ ქცეული დროშა ვარშავის მერიის თავზე.

"ჩვენ კვლავ სოლიდარული ვართ ბელარუსი ხალხის მიმართ. თქვენ განსაკუთრებული ძალა და სიმტკიცე გამოიჩინეთ სასტიკი რეპრესიების მიმართ. ჩვენ შთაგვაგონებს თქვენი სიმამაცე, რადგანაც თქვენ იბრძვით იმისთვის, რათა ბელარუსის მომავალი განსაზღვროთ", — ნათქვამია სახელმწიფო დეპარტამენტის განცხადებაში.

კანადა

კანადა

ისრაელი

რა ხდება ბელარუსში?

ბელარუსი ხალხი 9 აგვისტოს გამოქვეყნებული საპრეზიდენტო არჩევნების შედეგებს არ აღიარებს, რომლის თანახმადაც, მოქმედმა პრეზიდენტმა ალექსანდრ ლუკაშენკომ ხმების 80% აიღო და როგორც თვითონ განაცხადა, გაიმარჯვა. მომიტინგეები ითხოვენ:

  • ლუკაშენკო პრეზიდენტის თანამდებობიდან გადადგეს და რიგგარეშე არჩევნების მის გარეშე გაიმართოს;
  • გათავისუფლდნენ პოლიტიკური პატიმრები;
  • შეწყდეს პოლიციური ძალადობა.

მასობრივი საპროტესტო გამოსვლები ბელარუსში საპრეზიდენტო არჩევნების შედეგების გამოცხადების დღიდან, 9 აგვისტოს დაიწყო. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი, ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%. მოსახლეობის უმრავლესობამ არჩევნების ეს შედეგები არ ცნო და სამართლიანი არჩევნების მოთხოვნით, ქუჩებში უპრეცედენტო რაოდენობის ხალხი გამოვიდა.

საპროტესტო აქციებს ლუკაშენკომ მაშინვე რეპრესიები დაუპირისპირა. დემონსტრანტების დაკავებები პროტესტის პირველივე დღიდან დაიწყეს, ოპოზიციის წევრებს კი დაკითხვებზე იბარებდნენ.

არჩევნების შედეგების გამოცხადებიდან რამდენიმე დღეში ტიხანოვსკაიას ქვეყნის დატოვება მოუხდა. მან თავშესაფარი ლიტვაში მიიღო. მინსკსა და მოსკოვში კი მასზე ძებნა გამოცხადდა. ტიხანოვსკაიას მომხრეები ირწმუნებოდნენ, რომ მან ეს გადაწყვეტილება სამთავრობო ძალების ზეწოლის შედეგად მიიღო.

ტიხანოვსკაიას ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა, რომლის თითქმის ყველა წევრი დაიჭირეს, ნაწილმა კი თავს ქვეყნიდან გაქცევით უშველა.

გაიგეთ მეტი: