ისნის საოლქო კომისიის საქმეზე, გირაოს საფუძველზე გათავისუფლებული აკაკი კობალაძის ცოლი, სოფო სოსელია თბილისის მერიის ზედამხედველობის საქალაქო სამსახურმა 1 000 ლარით დააჯარიმა. საქმე ეხება თითქმის ორი თვის წინ, 9 დეკემბერს, პოლიტპატიმრების გათავისუფლების მოთხოვნით გამართულ აქციაზე, პარლამენტის უკანა შესასვლელთან, რკინის დროებით კედელზე საპროტესტო სტიკერის გაკვრას.

ზედამხედველობის სამსახურის ინფორმაციით, იგი დააჯარიმეს კულტურული მემკვიდრეობის დამცავ ზონაში პლაკატების თვითნებურად განთავსებისთვის. On.ge დაინტერესდა, რკინის დროებითი, დამცავი კედელი, რომელსაც აქციების დროს ამონტაჟებენ პარლამენტის მიმდებარე ტერიტორიაზე, რატომ ითვლება კულტურული მემკვიდრეობის ზონის შემადგენელ ნაწილად, თუმცა, მერიის ზედამხედველობის სამსახურში დამატებითი კომენტარის გაკეთება არ ისურვეს.

სოფო სოსელია ამბობს, რომ მან იცის, სად აქვს სტიკერების გაკვრის ნებართვა და სად არა. იგი თავს კანონდამრღვევად არ მიიჩნევს.

"სრულიად უსინდისოდ და უმოწყალოდ შეეხნენ ჩემს ოჯახს და ჩემი ოჯახის ღირსებას და მხოლოდ უსამართლობის გამო გადავდგი ის ნაბიჯები, რომლებიც გადავდგი, უბრალოდ ჩემი თავისუფალი სიტყვა მინდოდა გაეგონათ იმ უღირს ადამიანებს, ვისი შეთითხნილი ბრალდების საფუძველზეც ისხდნენ ეს ადამიანები ციხეში. მიუხედავად ამისა, არც ერთი წამით, სამართალსაწინააღმდეგო არ ჩამიდენია აბსოლუტურად არაფერი", — განაცხადა სოფო სოსელიამ ფორმულასთან.

მისი თქმით, სტიკერების გაკვრის დროს, იქ მყოფ სამართალდამცველებს სიტყვიერი გაფრთხილებაც არ მიუციათ მათთვის.

"არცერთ სამართალდამცავს არანაირი სიტყვიერი გაფრთხილება არ მიუცია და არც კი უთქვამს, ინფორმირების სახით, რომ არ შეიძლებოდა ამ სტიკერების გაკვრა", — ამბობს სოსელია.

ზედამხედველობის სამსახურში ამბობენ, რომ 9 დეკემბერს გამართული აქციის მონაწილეები დღეს, 5 თებერვალს, მას შემდეგ დააჯარიმეს, რაც შინაგან საქმეთა სამინისტროს საპატრულო პოლიციის დეპარტამენტმა, მათი საიდენტიფიკაციო მონაცემები თბილისის მუნიციპალურ ინსპექციას მოაწოდა.

აკაკი კობალაძესა და აკაკი ხუსკივაძეს გასული წლის 10 დეკემბერს, აღკვეთის ღონისძიება პატიმრობის ნაცვლად 10 000-ლარიანი გირაოთი შეეცვალათ. მათ პატიმრობა 9 ნოემბერს შეეფარდათ. პროკურატურის ვერსიით, 6 ნოემბერს ბრალდებულები ნაციონალური მოძრაობის სახელით შეხვდნენ თედო გობეჯიშვილს და 50 000 აშშ დოლარის სანაცვლოდ თანამდებობის დემონსტრაციულად დატოვება შესთავაზეს. ასევე, უთხრეს მას, რომ არჩევნების გაყალბების თაობაზე მედიასთან განცხადება გაეკეთებინა.

მათ დაკავებას წინ უძღოდა ქართული ოცნების საგანგებო ბრიფინგი, სადაც პარტიის წარმომადგენლებმა ენმ გარდაცვლილ გობეჯიშვილზე მუქარასა და ზეწოლაში დაადანაშაულეს.