ნაციონალური მოძრაობის ერთ-ერთი ლიდერის, ხატია დეკანოიძის განცხადებით, დეკლარაციის შევსებასთან დაკავშირებით საჯარო სამსახურის ბიურიოსგან მეილზე შეტყობინება მიიღო, სადაც აფრთხილებენ, რომ თუ არ შეავსებს, 1 000-ლარიანი ჯარიმა დაეკისრება, ხოლო გადაუხდელობის შემთხვევაში, მისი სისხლის სამართლებრივი პასუხისმგებლობა დადგება.

დეკანოიძე On.ge-სთან ამბობს, რომ მისთვის წარმოუდგენელია შეავსოს დეკლარაცია მაშინ, როცა პარლამენტის ლეგიტიმაციას არ აღიარებს და საკუთარი მანდატის გაუქმებასაც მოითხოვს.

"ვინაიდან დაწერილი მაქვს განცხადება, არ ვავსებ არც დეკლარაციას. თორემ დასამალი არაფერი არა მაქვს საერთოდ, არც ქონებრივ დეკლარაციაში. ჩემი ქონებრივი დეკლარაცია შესწავლილი აქვს ყველას, მათ შორის, უკრაინაში, ძალიან დაწვრილებით. მაგრამ მე არ მინდა ამ პარლამენტის წევრობა, არ ვანიჭებ ლეგიტიმაციას მას. ამიტომ ახლა, სახელმწიფო იყენებს სისხლის სამართალს და კანონს, რომ მე დამსაჯოს იმის გამო, რაც არ მინდა. ასეთი რაღაც უბრალოდ არსად გამიგია", — ამბობს ის.

დეკანოიძე არ გამორიცხავს, რომ მათ ნამდვილად დაეკისროთ 1 000-ლარიანი ჯარიმები და შემდეგ სისხლის სამართლებრივი დევნაც განხორციელდეს. როგორც ის აცხადებს, სანქციებს აუცილებლად გაასაჩივრებს.

"აბა, ეს სად წერია საერთოდ? წარმოუდგენელი რაღაც არის, რომ მე ვამბობ, არა, არ მსურს პარლამენტის წევრობა, უფლებამოსილება შემიწყვიტეთ, იმიტომ, რომ გაყალბდა არჩევნები და სახელმწიფო მეუბნება, შენ თუ არ გაივლი ყველა პროცედურას, რომელიც აუცილებელია, რომ პარლამენტის წევრმა გაიაროს, მაშინ დაგსჯი", — თქვა მან.

პარტია ლელოს წარმომადგენელი, ანა ნაცვლიშვილიც გვეუბნება, რომ შეტყობინება მიიღო. მისი განცხადებით, აპირებს, რომ დეკლარაცია შეავსოს, რადგან იგი ბოიკოტს უცხადებს, არა კანონს, არამედ არჩევნების გაყალბებულ შედეგებს.

"ძალიან ჩვეულებრივი ამბავია. ეს არც შევსლას ნიშნავს, არც გამოსვლას. მე მაქვს კანონიერი ვალდებულება და ვაპირებ რომ შევასრულო. ეს არ წარმოადგენს რაიმე სკანდალურ ამბავს, რომ ვინმე ამით პარლამენტის ლეგიტიმაციას სცნობს. სამართლებრივი ლოგიკითაც რომ მივყვეთ, თუ არ მივიჩნევთ, რომ დეპუტატები ვართ, განცხადებები რატომ დავწერეთ? ვართ დეპუტატები და იმიტომ დავწერეთ, რომ აღარ ვიყოთ", — აცხადებს იცი.

მისი თქმით, სანამ ხელისუფლების მიერ "კონსტიტუციის დარღვევით, პოლიტიკური მანიპულაციისთვის თუ არაკეთილსინდისიერი მიზნებით" არ ხდება მანდატების შეწყვეტა, ეს არ ნიშნავს, რომ იგი კანონს გამოუცხადებს დაუმორჩილებლობას.

"შესაბამისად, ამაში ვერ ვხედავ პოლიტიკურად ანგაჟირებად თემას. ამ კანონის მიზანია, გამჭვირვალობა, კორუფციასთან ბრძოლა. არ ვაპირებ, რომ კორუფციის წინააღმდეგ ბრძოლას, რომელსაც ზოგი კეთილსინდისიერად აწარმოებს, ზოგი არა, ჩემი მოქმედებით შევუქმნა ასეთი პრეცენდენტი. არ მომწონს ბევრი სხვა რაღაც, მაგრამ ამ კონკრეტულ შემთხვევაში კანონთან ამბოხი არ მიმაჩნია სწორად", — თქვა მან.

ამასთან, გირჩი — მეტი თავისუფლების ლიდერმა, ზურაბ ჯაფარიძემ საკუთარ ფეუსბუქზე დაწერა, რომ შეტყობინება მასაც მიუვიდა.

"რამე კიდევ დამავალეთ, ნუ გერიდებათ", — მიმართავს იგი ქართულ ოცნებას.

ჯაფარიძე On.ge-სთან ამბობს, რომ იგი არ აპირებს დეკლარაციის ჩაბარებას და დაელოდება ჯარიმის დაკისრების შემთხვევაში მოვლენები როგორ წარიმართება.

"ზოგადად, ჩვეულებრივ გიჟურ სიტუაციაში ვართ აღმოჩენილნი. აღმოჩნდა, რომ მდინარაძე და კობახიძე წყვეტენ მე ვიქნები თუ არა პარლამენტში და თუ არ ვიქნები, რაღაც სადამსჯელო ზომებს მიმართავს სახელმწიფო ჩემს წინააღმდეგ. ერთი, რომ რაღაც სისხლის სამართლის პასუხისგებაში მიცემით მემუქრებიან, ასევე, როგორც ფორმალურად პარლამენტის წევრს არ მაქვს უფლება, რომ ბიზნესი ვმართო, ვივაჭრო და ასე შემდეგ. და ეს ყველაფერი იმის გამო, რომ ვიღაცების აზრით, მათი გადასაწყვეტი ყოფილა მე ვიქნები თუ არა პარლამენტში", — გვეუბნება იგი.

რაც შეეხება ევროპული საქართველოს ყოფილ წევრს, ელენე ხოშტარიას, მან გვითხრა, რომ აღნიშნული შეტყობინება არ მიუღია, თუმცა მიღების შემთხვევაში, როგორც ახალი დეპუტატი, იგი დეკლარაციას არ შეავსებს.

"როგორც ძველ დეპუტატს, მგონი, 2 წელი ვალდებულება მაქვს [შევსების] და ამას გავარკვევ", — განაცხადა ხოშტარიამ.

საჯარო სამსახურის ბიუროს დეკლარაციების უზრუნველყოფის დეპარტამენტის უფროსის, დემნა ლობჟანიძის თქმით, გამომდინარე იქედან, რომ 11 დეკემბერს პარლამენტმა მე-10 მოწვევის პარლამენტის შემადგენლობის უფლებამოსილება სცნო, ოპოზიციონერ დეპუტატებს იმ დღიდან დეკლარაციის შევსების ვალდებულება წარმოეშვათ.

"კი, მათ მოითხოვეს პარლამენტის დატოვება, მაგრამ დღეს ხომ ისინი თანამდებობის პირები არიან? რადგან 11 დეკემბერს წარმოეშვათ დეკლარაციის შევსების ვალდებულება, დეკლარაცია მაინც უნდა შეავსონ", — ამბობს ის On.ge-სთან.

მისივე თქმით, მანდატების შეწყვეტასთან დაკავშირებით დაწერილი განცხადება არ ნიშნავს, რომ ისინი "თანამდებობის პირები აღარ არიან".

"რომც შეეწყვიტათ 2 თებერვლას [მანდატები], მათ დეკლარაციის შევსების ვალდებულება რჩებოდათ. კანონი გვეუბნება, დაინიშნა ადამიანი თანამდებობაზე? 2 თვის ვადაში უნდა შეავსოს დეკლარაცია", — აცხადებს ლობჟანიძე.

ოპოზიციონერ დეპუტატებს, რომლებმაც საკუთარ მანდატებზე უარი განაცხადეს, დეკლარაციის შევსების ვადა 11 თებერვალს ეწურებათ. იმ შემთხვევაში, თუ ისინი მას არ შეავსებენ, სანქციები დაეკისრებათ. ამასთან, საპარლამენტო უმრავლესობამ 2 თებერვალს ოპოზიციის მანდატების შეწყვეტისგან თავი შეიკავა.