დღეს, 3 თებერვალს, 14 საათზე, რუსთავში, ჟიული შარტავას ძეგლთან დემონსტრანტები შეიკრიბნენ, მოგვიანებით კი რუსთავის მერიის მიმართულებით, მთელს ქალაქში მსვლელობას გამართავენ. აქციის მონაწილეები რუსთავის აზოტიდან გათავისუფლებულ მუშებს უცხადებენ მხარდაჭერას.

"სამსახურის გარეშე დარჩენილი ხალხის უკან მრავალრიცხოვანი ოჯახებია. ისინი დარჩნენ იმ ბანკის ვალების პირისპირ, ანაზღაურების გარეშე, რომლის მფლობელობაშიც აზოტის ქარხანაა გადასული. სახელმწიფოს უპასუხისმგებლობა ქვეყნის უდიდეს კორპორაციას, საქართველოს ბანკს, აძლევს საშუალებას, უხეშად დაარღვიოს შრომის კოდექსი, მასობრივად გაათავისუფლოს მუშები, ისედაც მძიმე პირობებში მყოფი ქალაქის მდგომარეობა უფრო დაამძიმოს და უკვე პირდაპირი მეთოდით, სესხებისა და სხვა საბანკო მომსახურებების მეშვეობით, მეტად გააკონტროლოს რუსთავის აზოტის ქარხანაში დასაქმებული ადამიანები." - წერია აუდიტორია 115-ის ფეისბუკ ივენთში.

განცხადების თანახმად, სტუდენტები მზად არიან დაუპირისპირდნენ "ბანკების მმართველობასა და სახელმწიფოს უპასუხისმგებლო პოლიტიკას".

"ეს არ არის აზოტის ქარხნისა თუ მხოლოდ რუსთაველთა პრობლემა. ჩვენ მზად ვართ ისევე, როგორც ტყიბულში, ჭიათურაში, ზესტაფონში, ქსანსა თუ კაზრეთში სოლიდარობა გამოვუცხადოთ რუსთავის აზოტის ქარხნის მშრომელებს და ვიბრძოლოთ მათი მოთხოვნებისთვის."

რუსთავის აზოტის 300 ზე მეტი გათავისუფლებული თანამშრომელი და მათი მხარდამჭერები ადმინისტრაციის შენობასთან შეიკრიბნენ გუშინ, 2 თებერვალს. ისინი ადმინისტრაციასთან შეხვედრას, თანამშრომლების უპირობო აღდგენას და ახალი კონტრაქტების სასწრაფოდ შეცვლას ითხოვდნენ. მათ კომპანიის წარმომადგენელი ლევან ბურდულაძე ესაუბრა და განუმარტა, რომ გათავისუფლებულ თანამშრომლებს 3 თვის განმავლობაში კომპანია 500 ლარს გადაუხდის. მისივე თქმით, კომპანია კერძო საკუთრებაა და თვითონ წყვეტს ვისთან დადოს შრომითი ხელშეკრულება. ახალი კადრების საჭიროების შემთხვევაში კი ყოფილი თანამშრომლების დაბრუნება იქნება შესაძლებელი. ამასთან აქციის მონაწილეები ქარხანას ბრალს სდებენ თანამშრომლების კანონის დარღვევით გათავისუფლებაში.