მსოფლიო ჩემპიონატი ყინულის ჰოკეიში ბელარუსში აღარ გაიმართება. საბოლოო გადაწყვეტილება ყინულის ჰოკეის საერთაშორისო ფედერაციის (IIHF) საბჭოს წევრებმა გუშინ, 18 იანვარს მიიღეს.

ფედერაციის ვებგვერდზე გამოქვეყნებული განცხადების თანახმად, აღნიშნული გადაწყვეტილება უსაფრთხოების ზომებიდან გამომდინარე მიიღეს, რომელიც, მათივე თქმით, ორგანიზაციის კონტროლს არ ექვემდებარება.

მიუხედავად იმისა, რომ საბჭო მიიჩნევს, მსოფლიო თასი პოლიტიკური პროპაგანდისთვის არ უნდა გამოიყენებოდეს, IIHF-ში აღნიშნეს, რომ მინსკში ღონისძიების ჩატარება უადგილო იქნება, რადგან ქვეყანას უფრო სერიოზული პრობლემები აქვს, რომელთა მოგვარებაც აუცილებელია.

ვინ ჩაატარებს ჩემპიონატს ბელორუსის ნაცვლად, უახლოეს მომავალში გადაწყდება. TUT.BY-ს ცნობით, სავარაუდოდ, ამის შესახებ 25-26 იანვარს IIHF საბჭოს შემდეგი სხდომის დასრულების შემდეგ გახდება ცნობილი.

ტურნირი რიგასა და მინსკში, 2021 წლის 21 მაისიდან 6 ივნისამდე უნდა ჩატარებულიყო, თუმცა ლატვიამ ბელარუსთან ერთად ჩემპიონატის მასპინძლობაზე უარი ჯერ კიდევ სექტემბერში განაცხადა. ტურნირის ბელორუსში ჩატარებას, ასევე, IIHF-ის ვიცე-პრეზიდენტი კალერვო კუმოლა ეწინააღმდეგებოდა.

გასული კვირის ბოლოს Skoda-მ, Nivea-მ და Liqui Moly-მ ტურნირის სპონსორობაზე უარი თქვეს, თუკი ის ბელორუსში გაიმართება.

რა ხდება ბელარუსში?

ბელარუსი ხალხი 9 აგვისტოს გამოქვეყნებული საპრეზიდენტო არჩევნების შედეგებს არ აღიარებს, რომლის თანახმადაც, მოქმედმა პრეზიდენტმა ალექსანდრ ლუკაშენკომ ხმების 80% აიღო და როგორც თვითონ განაცხადა, გაიმარჯვა. მომიტინგეები ითხოვენ:

  • ლუკაშენკო პრეზიდენტის თანამდებობიდან გადადგეს და რიგგარეშე არჩევნების მის გარეშე გაიმართოს;
  • გათავისუფლდნენ პოლიტიკური პატიმრები;
  • შეწყდეს პოლიციური ძალადობა.

მასობრივი საპროტესტო გამოსვლები ბელარუსში საპრეზიდენტო არჩევნების შედეგების გამოცხადების დღიდან, 9 აგვისტოს დაიწყო. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი, ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%. მოსახლეობის უმრავლესობამ არჩევნების ეს შედეგები არ ცნო და სამართლიანი არჩევნების მოთხოვნით, ქუჩებში უპრეცედენტო რაოდენობის ხალხი გამოვიდა.

საპროტესტო აქციებს ლუკაშენკომ მაშინვე რეპრესიები დაუპირისპირა. დემონსტრანტების დაკავებები პროტესტის პირველივე დღიდან დაიწყეს, ოპოზიციის წევრებს კი დაკითხვებზე იბარებდნენ.

არჩევნების შედეგების გამოცხადებიდან რამდენიმე დღეში ტიხანოვსკაიას ქვეყნის დატოვება მოუხდა. მან თავშესაფარი ლიტვაში მიიღო. მინსკსა და მოსკოვში კი მასზე ძებნა გამოცხადდა. ტიხანოვსკაიას მომხრეები ირწმუნებოდნენ, რომ მან ეს გადაწყვეტილება სამთავრობო ძალების ზეწოლის შედეგად მიიღო.

ტიხანოვსკაიას ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა, რომლის თითქმის ყველა წევრი დაიჭირეს, ნაწილმა კი თავს ქვეყნიდან გაქცევით უშველა.

გაიგეთ მეტი: