იუსტიციის მინისტრის მოადგილედ აკაკი საღირაშვილი დაინიშნა. 2018 წლიდან დღემდე ის ეკონომიკისა და მდგრადი განვითარების მინისტრის მოადგილედ მუშაობდა.

2007-2015 წლებში საღირაშვილი მუშაობდა საქართველოს რკინიგზაში სხვადასხვა პოზიციებზე. 2009-2011 წლებში ის კავკასიის სამართლის სკოლის (CSL) სამოქალაქო სამართლის ლექტორი გახლდათ.

2020 წლის საპარლამენტო არჩევნების შემდეგ, საქართველოს იუსტიციის მინისტრი გოჩა ლორთქიფანიძე გახდა. ლორთქიფანიძე 2012 წლიდან იუსტიციის მინისტრის მოადგილე იყო.

ცოტა ხანში, ცნობილი გახდა, რომ ლორთქიფანიძე სისხლის სამართლის საერთაშორისო სასამართლოს (ICC) მოსამართლედ, აღმოსავლეთ ევროპის კვოტით, 2021-2030 წლების ვადით, აირჩიეს. ჰააგის სასამართლოში ქართველი მოსამართლე სამართლებრივ საქმიანობას რამდენიმე თვეში შეუდგება.

იუსტიციის ყოფილმა მინისტრმა, თეა წულუკიანმა აღნიშნული თანამდებობა 29 სექტემბერს დატოვა. მეათე მოწვევის პარლამენტში იგი განათლების, მეცნიერებისა და კულტურის კომიტეტის თავმჯდომარედ აირჩიეს.