ებოლასგან განკურნებული პაციენტები ჯანმრთელობის სხვა პრობლემებით იტანჯებიან. ახალი კვლევა ამერიკის ჯანმრთელობის ნაციონალურ ინსტიტუტს ეკუთვნის. ექიმები ამბობენ, რომ მომაკვდინებელი ვირუსისგან გადარჩენილებს შერყეული ჯანმრთელობა დიდხანს გაჰყვებათ.

აფრიკის დასავლეთში 17 ათას ადამიანზე მეტი გადაურჩა ებოლას. მათ ნაწილს განკურნებიდან 6 თვის განმავლობაში ჰქონდა რთული ნევროლოგიური მდგომარეობა, იყო კომაში ჩავარდნის შემთხვევებიც. 6 თვის შემდეგ დაავადებების ახალმა ნაკადმა დაიწყო განვითარება.

კვლევის მიხედვით, ლიბერიელი პაციენტები ებოლასგან განკურნების 6 თვის თავზეც განიცდიან გამუდმებულ თავის ტკივილსა და სისუსტეს, დაკარგული აქვთ მეხსიერების ნაწილი და მიდრეკილნი არიან დეპრესიისკენ, მათ ნაწილს აქვთ ჰალუცინაციები და სუიციდისკენ მისწრაფებას ავლენენ.

"ამ ადამიანებისთვის ებოლა არ დასრულებულა", - უთხრა ექიმმა ლაურენ ბოუენმა BBC-ის, "ისინი ვერ უბრუნდებიან თავიანთ ცხოვრებას".

ებოლას ინფექცია ორგანიზმს ანადგურებს და სხვადასხვა სიმპტომი დროთა განმავლობაში იჩენს თავს. ის ადამიანში ფსიქოლოგიურ ტრამვასაც ტოვებს, რადგან პაციენტები მკურნალობისას იზოლირებულნი არიან ახლობლებისგან, ან მოგვიანებით ხდება მათი გარიყვა.

ებოლასგან განკურნებული პაციენტები განკურნების შემდეგ სექსუალურად აქტიურები არიან თუმცა, ყოველი 100-დან მხოლოდ 4 მოიხმარს პრეზერვატივს, რაც დაავადების ხელახლა გავრცელების რისკს ზრდის.

BBC-ის მიხედვით, სტატისტიკური მონაცემები Retroviruses and Opportunistic Infections-ის კონფერენციაზე პრეზენტაციის დროს გახდა ცნობილი.

ებოლა პირველად 1976 წელს გამოჩნდა. იშვიათმა ვირუსმა, რომელსაც მაღალი სიკვდილიანობა ახასიათებს, სწრაფი გავრცელება დასავლეთ აფრიკაში 2013 წლის დეკემბერში დაიწყო. ჯანდაცვის მსოფლიო ორგანიზაციის ინფორმაციით, 2016 წლის 17 თებერვლისთვის ვირუსით 11,315 ადამიანია გარდაცვლილი. ებოლა გადამდებია სისხლით, ან კანის კანთან კონტაქტით. ვირუსით გარდაცვლილი ცხოველის ან ადამიანის გვამი ინფექციის მატარებლად ითვლება. ებოლას ვაქცინა ჯერჯერობით არ არსებობს, თუმცა მის შექმნაზე აქტიური მუშაობა გრძელდება.