თავდაპირველად მასალის სათაური იყო: "საქართველოს ფოსტამ გორის ფილიალის 11 თანამშრომელს კონტრაქტი შეუუწყვიტა — რას აპროტესტებდნენ დასაქმებულები და რას პასუხობენ ფოსტაში", თუმცა დაზუსტების შემდეგ სათაური ჩასწორდა.

საქართველოს ფოსტის გორის ფილიალში 11 თანამშრომელს კომპანიამ კონტრაქტი შეუჩერა. ეს მას შემდეგ მოხდა, რაც თანამშრომლები გაფიცვის რეჟიმში გადავიდნენ და დაბალი ხელფასები და დაზღვევის არქონა გააპროტესტეს.

"ხელფასის მომატებას, დაზღვევას და ეგ იყო რა. არ განიხილეს ჩვენი მოთხოვნები და უკანონოდ გამოაცხადეს. ყველას შეგვიჩერეს თანამშრომლობა. ჩვენ რაც შეგვეძლება, გავაკეთებთ", — აცხადებს ერთ-ერთი თანამშრომელი TV პირველთან.

როგორც On.ge-ს ადამიანის უფლებათა ცენტრის იურისტმა, ალექსი მერებაშვილმა განუცხადა, თანამშრომლებს კონტრაქტი გარკვეული პერიოდის მანძილზე შეუწყდათ. ორშაბათიდან კი, სავარაუდოდ, თანამშრომლები გაფიცვას შეწყვეტენ და მოლაპარაკებების პროცესში ჩაერთვებიან.

"ისინი ჯერ განთავისუფლებულები არ არიან, შეუჩერდათ შრომითი ხელშეკრულებები გაფიცვის გამო. კოდექსითაა გათვალისწინებული, რომ ჩერდება ამ შემთხვევაში ხელშეკრულება, რაც ნიშნავს, რომ გაფიცული დღეების ხელფასს არ აიღებენ. დღეს გავაკეთეთ ისე, რომ, სავარაუდოდ, დაიწყება მოლაპარაკებები ამ კუთხით და ორშაბათს გაირკვევა, რა და როგორ იქნება. გაფიცვა, სავარაუდოდ, ორშაბათიდან შეწყდება, თუმცა მოთხოვნები ისევ დარჩება ძალაში", — გვითხრა მერებაშვილმა.

მისივე განმარტებით, დასაქმებულებს რამდენიმე ძირითადი მოთხოვნა ჰქონდათ: ეს იყო დაბალი ხელფასები, დაზღვევის არარსებობა და საახალწლოდ მომატებული სამუშაოს ფონზე არგაზრდილი ანაზღარურება.

"პირველი მიზეზი ხელფასის სიმცირე იყო. თბილისში დასაქმებულ კურიერებთან შედარებით, დისკრიმინაციულ მდგომარეობაში იყვნენ. ამბობდნენ, გაცილებით მეტ სამუშაოს ვასრულებთ და გაცილებით დაბალი ხელფასი გვაქვსო. ასევე, ითხოვდნენ დაზღვევის ამოქმედებას, ადრე გვქონდა და წელიწად-ნახევრის წინ შეგვიწყდაო და ამოქმედებას გვპირდებიან და არ ასრულებენო. მესამე კი საახალწლო დანამატები იყო, რომელსაც ყოველწლიურად იღებდნენ, თუმცა წელს პანდემიის გამო უარი უთხრეს. არადა, ფოსტა გავიდა შესაბამის მოგებაზე, შარშანდელზე მეტი მოგება ჰქონდათ და პანდემიას ასახელებენ მიზეზად იმისა, რომ დანამატები არ გაცემულიყო", — გვეუბნება იურისტი მერებაშვილი.

On.ge დაუკავშირდა საქართველოს ფოსტასაც, სადაც აცხადებენ, რომ შრომითი ხელშეკრულებების შეწყვეტა თანამშრომლების მიერ დამატებითი "ჯილდოს" მოთხოვნამ განაპირობა.

"საქართველოს ფოსტის გორის სერვისცენტრში მომუშავე კურიერებმა 5 იანვრიდან დამატებითი ჯილდოს მოთხოვნით, უარი განაცხადეს ხელშეკრულებით გათვალისწინებული მოვალეობების შესრულებაზე და გაიფიცნენ, რამაც გამოიწვია სამუშაო პროცესის შეფერხება. მაშინ, როცა მსოფლიო პანდემიის ფონზე საქართველოს ფოსტამ ყველა ღონისძიებას მიმართა იმისათვის, რომ შეენარჩუნებინა თითოეული სამუშაო ადგილი და მეტიც, თანამშრომლებს შეუფერხებლად მიეღოთ კუთვნილი ანაზღურება, გორის სერვისცენტრის კურიერების მხრიდან დამატებითი ჯილდოს მოთხოვნამ განაპირობა საქართველოს ფოსტის გადაწყვეტილება შეეჩერებინა შრომითი ხელშეკრულება აღნიშნულ პირებთან და მიემართა სასამართლოსთვის გაფიცვის უკანონოდ ცნობასთან დაკავშირებით", — აცხადებენ ფოსტაში.