საზოგადოებრივი მაუწყებლის სტრატეგიული განვითარების ხელმძღვანელად მწერალი პაატა ქურდაძე განიხილება. მან უკვე მიიღო არხის მენეჯმენტისგან ამ თანამდებობაზე მუშაობის შეთავაზება. თუმცა, მაუწყებელი ახლა მის პასუხს ელოდება.

საზოგადოებრივი მაუწყებლის გენერალური დირექტორი, ვასილ მაღლაფერიძე ამბობს, რომ ქურდაძეზე ყურადღება მისი პროფესიონალიზმისა და გამოცდილების გამო შეაჩერეს.

„პაატა ქურდაძე შევარჩიე პროფესიონალიზმის გამო, უზარმაზარი გამოცდილება აქვს - არაერთი ქვეყნის ტელევიზიაში მუშაობის და აქვს ძალიან საინტერესო ხედვები. ძალიან კარგად იცნობს ამ საქმეს,“ - აღნიშნა ვასილ მაღლაფერიძემ.

საზოგადოებრივი მაუწყებლის გენერალურ დირექტორად არჩევის შემდეგ ვასილ მაღლაფერიძემ საკუთარ მრჩევლად მუშაობა უკვე შესთავაზა ია ანთაძეს, რომლისგანაც თანხმობა მიიღო. ანთაძე მაღლაფერიძეს რჩევებს საზოგადოებრივ-პოლიტიკური გადაცემებისა და საზოგადოებასთან ურთიერთობის კუთხით აძლევს.