ახალმა პანდემიამ, გამკაცრებულმა უსაფრთხოების ზომებმა, გახანგრძლივებულმა კარანტინმა, ფიზიკური დისტანციის დაცვის მუდმივმა მოწოდებამ თუ კინოთეატრების დახურვამ მსოფლიოს თითქმის ყველა წერტილში ადამიანებს მხოლოდ შეზღუდული არჩევანი დაუტოვა, თუ როგორ შეიძლება გაიყვანო დრო და რა თავშესაქცევი იპოვო.

ამ ყველაფრის გამო, ალბათ, თქვენც შენიშნავდით, რომ სერიალების პოპულარობამ წარმოუდგენლად იმატა, რასაც თუნდაც ის ფაქტი ცხადყოფს, რომ ჩვენს ფეისბუქჯგუფში ერთი სერიაც და... წევრების რაოდენობა ერთიორად გაიზარდა, ყველა საინტერესო სატელევიზიო შოუს შესახებ განხილვები კი უფრო გაცხარდა.

შესაბამისად, შეიძლება ითქვას, რომ 2020 წელი სერიალებისთვის ნაყოფიერი აღმოჩნდა: გამოვიდა ახალი შოუები, რომლებმაც უცებ გაითქვეს სახელი; ბაზარზე ასევე გამოჩნდა ახალი სტრიმინგ სერვისები, რომლებიც მომავალში კიდევ უფრო მრავალფეროვან არჩევანს გვპირდებიან და ა.შ.

ამის გათვალისწინებით, ახლა იმ 20 მნიშვნელოვან მოვლენას გავიხსენებთ, რომელზეც როგორც ქართული, ისე მსოფლიო პუბლიკა ამ წლის განმავლობაში ყველაზე აქტიურად საუბრობდა.

1. აღმოჩნდა, რომ ჭადრაკი არც ისე მოსაწყენი თამაში ყოფილა

სერიალების გულმხურვალე მოყვარულებს იმდენი რამ უნახავთ, ვინ იფიქრებდა, რომ ჭადრაკზე გადაღებული შოუ საინტერესო იქნებოდა? მეტიც, სერიალმა ლაზიერის გამბიტი (The Queen's Gambit) უამრავ ადამიანს უბიძგა, რომ დავიწყებული ცოდნა გაეხსენებინა ან საერთოდაც ჭადრაკის თამაში პირველად ესწავლა.

ასევე იხილეთ:

• 10 საინტერესო ფაქტი The Queen's Gambit-ის შესახებ
• როგორ დავიწყოთ ჭადრაკის თამაში — წესები და გზამკვლევი
• ჭადრაკის მსოფლიო ჩემპიონი, გარი კასპაროვი The Queen’s Gambit-ს აფასებს

2. მეტმა ადამიანმა გაიგო, რომ დოკუმენტური სერიალიც შეიძლება ისეთივე საინტერესო, დაძაბული და ჩამთრევი იყოს, როგორც მხატვრული

ნეტფლიქსის დოკუმენტური სერიალი ვეფხვების მეფე (Tiger King) ამ წლის ნამდვილად ერთ-ერთი ყველაზე ხმაურიანი პროექტი აღმოჩნდა: თამამად შეიძლება ითქვას, რომ პანდემიის პირველი ტალღა მილიონობით მაყურებელს სწორედ იმის გარკვევამ გადაატანინა, თუ ვინ უფრო საშიში ადამიანია — კეროლ ბასკინი თუ ჯო ეგზოტიკი.

და მაინც, თქვენ როგორ ფიქრობთ?

ასევე იხილეთ:

• Tiger King-ის შემდეგ ვარსკვლავები ვეფხვების დაცვის გამკაცრებას ითხოვენ
• სასამართლომ ჯო ეგზოტიკის ზოოპარკი Tiger King-ის კეროლ ბასკინს გადასცა
• 5 სერიალი, რომელიც Tiger King-ის შემდეგ უნდა ნახოთ
• აშშ-ში Tiger King პირველ 10 დღეში 34 მილიონზე მეტმა ადამიანმა ნახა

3. ჯონასის დროში მოგზაურობა დასრულდა

27 ივნისს, აპოკალიფსის დღეს, გერმანული სამეცნიერო ფანტასტიკის ჟანრის გახმაურებული პროექტი ბნელი (Dark) მესამე სეზონით დასრულდა, მაყურებლების ნაწილმა კი ვერ გაიგო, ფინალურმა სეზონმა მანამდე არსებულ კითხვებს გასცა პასუხი თუ უფრო მეტი ახალი კითხვა გააჩინა.

ასევე იხილეთ:

• ბრწყინვალე ფინალი — როგორ აფასებენ Dark-ის მესამე სეზონს

4. როგორც იქნა, The Crown-ში პრინცესა დაიანა გამოჩნდა

რასაც, ცხადია, სკანდალების გარეშე არ ჩაუვლია, თუმცა ამავდროულად გვირგვინის უამრავმა მაყურებელმა ხელახლა გაიხსენა, თუ რატომ იყო მისი პიროვნება ასეთი გამორჩეული გაერთიანებული სამეფოს უახლეს ისტორიაში.

ასევე იხილეთ:

• მიუთითეთ, რომ The Crown ფიქციაა — ბრიტანეთის ხელისუფლება ნეტფლიქსს მიმართავს
• პრინცესა დაიანას 8 კოსტიუმი, რომელიც The Crown-ში თითქმის უნაკლოდ აღადგინეს
• 20 ფოტო, რომელიც ამტკიცებს, რომ დაიანა მოდის პრინცესაც იყო
• The Crown-ისთვის პრინცესა დაიანას საქორწინო კაბა შთამბეჭდავად აღადგინეს

5. რიდლი სკოტმა სატელევიზიო სამყაროშიც მოსინჯა ძალები

და ეს ძალიან წარმატებულადაც გამოუვიდა: მართალია, რიდლი სკოტი მგლების აღზრდილის (Raised by Wolves) მხოლოდ ორი ეპიზოდის რეჟისორია, მაგრამ იმ საბოლოო შედეგში, რაც შოუს შემქმნელებმა მაყურებელს წარუდგინეს, მისი წვლილი მაინც საკმაოდ დიდია.

6. ოზარკმა მაყურებლებისგან საკმარისი ყურადღება მესამე სეზონით მაინც დაიმსახურა

ამ კრიმინალური დრამის მესამე სეზონის ათივე ეპიზოდი, როგორც იტყვიან, ბომბა აღმოჩნდა, რითიც ამ შოუს ერთგული მაყურებლების სიაში უფრო მეტი ადამიანი ჩაეწერა.

ასევე იხილეთ:

• ნეტფლიქსმა Ozark-ის ფინალური, მეოთხე სეზონი დააანონსა

7. Rick and Morty-ის შემქმნელებმა ახალი ანიმაციური სერიალი გამოუშვეს

Solar Opposites-ი ბევრისთვის რიკი და მორტიზე უკეთესი თუ არა, უარესი ნამდვილად არ აღმოჩნდა.

8. HBO-ს ეიფორიის სპეციალური ეპიზოდი მოსალოდნელზე უფრო შთამბეჭდავი გამოუვიდა

მარტო ის რად ღირს, რომ შოუს შემოქმედებმა მეორე სეზონის გამოსვლამდე დროის მოსაკლავად შუალედური ეპიზოდები შემოგვთავაზეს, მაგრამ პირველი ეპიზოდი, რომელიც ზენდეიას პერსონაჟის ირგვლივ თითქმის უწყვეტი დიალოგის საშუალებით ვითარდება, კინოსურათს უფრო ჰგავს, რომელიც მაყურებელზე წარუშლელ კვალს ტოვებს.

ასევე იხილეთ:

• რა მოხდა შემდეგ — ნახეთ Euphoria-ს სპეციალური ეპიზოდის ტრეილერი
• Euphoria-ს მეორე სპეციალური სერიის გამოსვლის თარიღი ცნობილია

9. ჰილ ჰაუსის მოჩვენების მეორე სეზონმა იმედები არ გაგვიცრუა

ბლაის მამულის მოჩვენება ამ ანთოლოგიური შოუს, მართალია, უფრო ნაკლებად საშიში, თუმცა კვლავინდებურად სევდიანი, ტრაგიკული და მაღალი ხარისხის სანახაობა გამოდგა.

ასევე იხილეთ:

• 10 ხუმრობა ჰილჰაუსის მოჩვენების მეორე სეზონზე, რომელიც 100%-ით ზუსტია
• არ იცი, საიდან გეცნობა Bly Manor-ის ბიძია ჰენრი? ის პატარა ბიჭია E.T.-დან

10. სანაცვლოდ სხვა საყვარელი სერიალების ახალმა სეზონებმა გვატკინა გული

შორს რომ აღარ წავიდეთ, მარტო სახეცვლილი ნახშირბადის მეორე და ფარგოს მეოთხე სეზონების ხსენებაც საკმარისი იქნება.

ასევე იხილეთ:

• სერიალის 12 ყველაზე ცუდი სეზონი, რომელმაც მთელი შოუ გააფუჭა

11. ვინს გილიგანმა ხარისხი არ დააგდო

სერიალის Better Call Saul (უმჯობესია, სოლს დაურეკოთ) მეხუთე სეზონი ტრადიციულად შთამბეჭდავი აღმოჩნდა: ზუსტად ისეთი, როგორი მოლოდინებიც მისმა შემოქმედმა, ვინს გილიგანმა წინა სეზონებითა თუ Breaking Bad-ით (მძიმე დანაშაული) შეგვიქმნა.

ასევე იხილეთ:

• Better Call Saul მეექვსე სეზონით 2021 წელს დასრულდება

12. შევიყვარეთ ახალგაზრდა და საოცრად ნიჭიერი მსახიობი შირა ჰასი

Unorthodox-ის (არაორთოდოქსი) ვარსკვლავი ისეთი ტრაგიკული ბედის მქონე პერსონაჟს განასახიერებს, რომ რთულია, თავისთავად არ თანაუგრძნო მას, თუმცა შირა ჰასის მიმართ მრავალი მაყურებლის განსაკუთრებული დამოკიდებულების საიდუმლო მაინც მისი გამორჩეული სამსახიობო შესრულებაა და იმედია, მომავალშიც ხშირად ვიხილავთ ეკრანებზე.

13. დავრწმუნდით, რომ ერთი შეხედვით გაცვეთილი ისტორიაც შეიძლება მომხიბვლელად გააცოცხლო

ირლანდიელი მწერლის სალი რუნის რომანი Normal People (ჩვეულებრივი ადამიანები) ბოლო პერიოდში დიდი პოპულარობით სარგებლობს მკითხველებში საერთაშორისო მასშტაბით. წელს კი ამ წიგნის მიხედვით გადაღებული სერიალიც ვიხილეთ, რომელმაც არანაკლები თაყვანისმცემლები შეიძინა.

ასევე იხილეთ:

• Normal People-ის გმირები Fleabag-ის მღვდელს აღსარებას აბარებენ — ნახეთ სახალისო ვიდეო

14. HBO-მ ტრადიციულად საინტერესო კრიმინალური ისტორია შემოგვთავაზა

ალბათ, იმის თქმაც საკმარისია, რომ The Outsider (გარიყული) სტივენ კინგის რომანის მიხედვით გადაიღეს, რომ მათ, ვისაც ის ჯერ არ უნახავთ, წარმოიდგინონ, თუ რაოდენ საინტერესო ისტორიას შეიძლება მოგვითხრობდეს ეს მისტიკით, დრამითა და საშინელებათა ჟანრის ელემენტებით სავსე კრიმინალური სერიალი.

15. კიდევ ერთი მაგალითი ვიხილეთ იმისა, რომ ევროპის, კონკრეტულად კი პარიზის, ჰოლივუდური აღქმა კვლავ რეალობას აცდენილია

რბილად რომ ვთქვათ, ემილი პარიზში (Emily In Paris) მოდური კლიშეებით სავსე პროექტი გამოდგა.

ასევე იხილეთ:

• ახალი ქერი ბრედშოუ — 12 მოდური სამოსი სერიალიდან Emily in Paris
• სად იყო პარიზი, როცა ლილი კოლინზი თბილისიდან და ბათუმიდან პოსტავდა
• Emily In Paris მეორე სეზონით დაბრუნდება

16. გადავიმეორეთ ჭეშმარიტება: ნებისმიერი შოუს წარმატებისთვის ერთი ნიკოლ კიდმანიც საკმარისია

ვერ ვიტყვით, რომ The Undoing-ის (განადგურება) ერთადერთი დადებითი მხარე ნიკოლ კიდმანის თამაში იყოო, თუმცა იმასაც ვაღიარებთ, რომ მხოლოდ მისი ხილვაც საკმარისი მიზეზია, რომ რომელიმე შოუს ყურება დავიწყოთ.

ასევე იხილეთ:

• The Undoing-ის ფინალს HBO-ზე ყველაზე მეტი მაყურებელი ჰყავდა

17. მაყურებელი ვერ შეთანხმდა, რიზ უიზერსპუნის პერსონაჟი უფრო ეზიზღებათ თუ კერი ვაშინგტონის

Little Fires Everywhere (ყველგან ცეცხლი გიზგიზებს) ალბათ, ის სერიალია, რომელიც მაყურებლებს შორის 2020 წელს ყველაზე მეტი კამათის მიზეზი გახდა: იმის განხილვასთან ერთად, არის თუ არა ის კარგი შოუ, იმაზეც არ შედგა კონსესუსი, თუ ვინ არის ამ ისტორიის მტავარი ანტაგონისტი — ელენა თუ მია?

ასევე იხილეთ:

• 10 საინტერესო ფაქტი Little Fires Everywhere-ის შესახებ

18. Sex Education მოზარდების (და არამარტო) საუკეთესო მასწავლებლის ტიტულს კვლავ ინარჩუნებს

გარდა იმისა, რომ ნეტფლიქსის სერიალი სექსუალური განათლება თავის სახელწოდებას საუკეთესოდ ამართლებს, უფრო მნიშვნელოვანი თემების შესახებაც ემოციურად და რაც მთავარია, სწორი აქცენტებით მოგვითხრობს.

ასევე იხილეთ:

• ნეტფლიქსმა Sex Education-ის მესამე სეზონი დააანონსა
• ტესტი: გაიგე, Sex Education-ის რომელი პერსონაჟი ხარ

19. RuPaul's Drag Race-ის მეთორმეტე სეზონის ფინალი Zoom-ში გაიმართა

მართალია, სერიალი არ არის, მაგრამ ჩვენს რედაქციაში ეს პროექტი ძალიან გვიყვარს და სანამ მეცამეტე სეზონს ველოდებით, წინა სეზონიც გავიხსენეთ: სამყაროში ამ ყველაზე უჩვეულო რეალითი შოუს გულშემატკივრებს რა არ უნახავთ, მაგრამ ვინ წარმოიდგენდა, რომ ისეთი მნიშვნელოვანი მოვლენა, როგორიც საუკეთესი დრეგ ქუინის გამოვლენაა, დისტანციურად მოხდებოდა.

ასევე იხილეთ:

• RuPaul's Drag Race-ის 34 წლის ვარსკვლავი ჩი ჩი დევეინი გარდაიცვალა
• დრეგ ქუინების ისტორია: შექსპირიდან პოპ-სამყარომდე
• 10 დრეგ ქუინ შემსრულებელი, რომელიც თქვენს ფლეილისტში დღესვე უნდა დაამატოთ

20. დავემშვიდობეთ არაერთ საყვარელ და საკულტო სერიალს

მოუშუშებელი იარების გასახსენებლად მხოლოდ მათი სახელწოდებების ჩამოთვლაც კმარა: BoJack Horseman (ცხენკაცი ბოჯეკი), The Good Place (კარგი ადგილი), Homeland (სამშობლო), Modern Family (თანამედროვე ოჯახი) თუ Schitt's Creek.

ასევე იხილეთ:

• როგორ შეიცვალნენ Modern Family-ის მსახიობები პირველიდან ბოლო სეზონამდე
• BoJack Horseman: ცხენი, რომელიც ვერ დარბის