Ozark ნეტფლიქსის ერთ-ერთი ყველაზე გახმაურებული სერიალია, რომლის მესამე სეზონის პრემიერაც წელს, 27 მარტს შედგა და შოუში მოთხრობილი კრიმინალური ისტორია კარანტინში მრავალი მაყურებლის საყვარელ სანახაობად იქცა.

ამის შემდეგ ერთგული გულშემატკივრები მუდმივად ელოდნენ სიახლეებს შოუს გაგრძელებასთან დაკავშირებით და აი, უკვე დადასტურებულად ვიცით, რომ სერიალი ნამდვილად გრძელდება, ოღონდ მხოლოდ ერთი სეზონით — მეოთხე სეზონით ის საბოლოოდ დასრულდება.

"ახალ სეზონი ბიორდების ოჯახის თავგადასავლის ბოლო თავი იქნება და მათი მოგზაურობაც, რომელიც ჩიკაგოს გარეუბნიდან კრიმინალურ გამოცდილებამდე განვითარდა, დასრულდება", — ვკითხულობთ ნეტფლიქსის მიერ გავრცელებულ მოკლე განცხადებაში.

Ozark

ფოტო: Netflix

ჯერ კიდევ აპრილში შოუს მსახიობმა ჯეისონ ბეიტმენმა ფანები გააფრთხილა, რომ მესამე სეზონის გამოსვლის შემდეგ Ozark უკვე ძალიან ახლოს იყო დასასრულთან და აი, უკვე ვიცით, თუ რას გულისხმობდა ის.

"მოხარულები ვართ, რომ ნეტფლიქსი აცნობიერებს ამ პროექტის მნიშვნელობას და უფრო მეტი დრო მოგვცა, რათა ეს საგა დასასრულამდე მივიყვანოთ. ეს ყველა ჩვენგანისთვის შესანიშნავი გამოცდილება იყო ეკრანზე და მის მიღმაც, ამიტომ მოუთმენლად ველით, რომ ბოლომდე მივიყვანოთ დაწყებული საქმე", — განაცხადა შოუს აღმასრულებელმა პროდიუსერმა კრის მანდიმ.

სერიალის ერთგულ გულშემატკივრებს იმითღა თუ შეუძლიათ ინუგეშონ თავი, რომ ფინალური, მეოთხე სეზონი ყველაზე დიდი — 14-ეპიზოდიანი იქნება, რაც შოუს შემქმნელებს შესაძლებლობას მისცემს, რომ მეტი დროის გამოყენებით სიუჟეტურუ ხაზის ლოგიკური და ღირსეულუ ფინალი შექმნან.

სამწუხაროდ, ჯერჯერობით ცნობილი არ არის, თუ როდის დაიწყება ახალ სეზონზე მუშაობა და როდის შეძლებს მის ხილვას მაყურებელი.