ნეტფლიქსის გახმაურებულ დოკუმენტურ სერიალში Tiger King ასახული დაპირისპირება ჯო ეგზოტიკსა და კეროლ ბასკინს შორის ახალ საფეხურზე გადავიდა: ჯო ეგზოტიკის ზოოპარკი კეროლ ბასკინს გადაეცა სამართავად.

CNN-ის ცნობით, ოკლაჰომას შტატში მდებარე ზოოპარკი, რომელსაც ბოლო წლებში ჯეფ ლოუი განკარგავდა, სასამართლოს დადგენილების მიხედვით კეროლ ბასკინის კომპანია Big Cat Rescue-ს გადაეცა სამართავად.

კეროლ ბასკინი, რომელიც ფლორიდაში ცხოველების თავშესაფრის მეპატრონეა, წლების განმავლობაში აკრიტიკებდა ჯო ეგზოტიკს ცხოველებთან სასტიკი მოპყრობის გამო.

პარალელურად ჯო ეგზოტიკი აცხადებდა, რომ ბასკინს მისი ბიზნესის განადგურება სურდა და ამის გამო ბასკინის განცხადებებს ცილისწამებას უწოდებდა.

ფოტო: Netflix

საბოლოოდ გასულ წელს ჯო ეგზოტიკის სახელით ცნობილი ჯოზეფ მალდონადო დააპატიმრეს და 22-წლიანი პატიმრობაც მიუსაჯეს ცხოველებზე არაადამიანური მოპყრობისა და კეროლ ბასკინის მკვლელობის მცდელობისთვის.

სასამართლოზე წარმოდგენილი სამხილებით დამტკიცდა, რომ მან $3 000 გადაუხადა კაცს, რათა ბასკინი მოეკლა. ასევე მოკლა ხუთი ვეფხვი და ყიდდა ლემურის ნაშიერებს, ყალბ საბუთებში კი წერდა, რომ ისინი გააჩუქა.

კეროლ ბასკინს სასამართლოს გადაწყვეტილებაზე ჯერ საჯარო კომენტარი არ გაუკეთებია, თუმცა ნეტფლიქსის ამ შოუს მაყურებლებს მისი ემოციების წარმოდგენა, ალბათ, არც გაუჭირდებათ.