ემილი კუპერი პარიზიდან წასვლას ჯერ არ გეგმავს, რაც იმას ნიშნავს, რომ სუპერპოპულარული რომანტიკული კომედიის, Emily in Paris-ის გაგრძელებას ვიხილავთ.

სერიალის პირველი სეზონის გამოსვლიდან თითქმის 2 თვის შემდეგ, ნეტფლიქსმა მეორე სეზონი დაამტკიცა. მართალია სატელევიზიო შოუმ ფრანგების (და არამარტო) კრიტიკა დაიმსახურა, თუმცა ის სტრიმინგ სერვისის ერთ-ერთი ყველაზე წარმატებული პროდუქტი აღმოჩნდა. გამოსვლიდან პირველ კვირაში, ემილი პარიზში 10 ყველაზე ნახვად შოუდ იქცა და გადაუსწრო ისეთ პოპულარულ სერიალებს, როგორიცაა გრეის ანატომია [Grey’s Anatomy] და კრიმინალური აზროვნება [Criminal Minds].

სერიალი 20 წელს გადაცილებულ ამბიციურ ემილი კუპერზეა, რომელიც ჩიკაგოდან პარიზში გადადის სამუშაოდ და ახალ ცხოვრებას იწყებს. მისი მარკეტინგული სტრატეგია წარმატებას აღწევს, თუმცა გამოწვევები არ წყდება მის პირად ურთიერთობებში. სერიალი მთლიანად პარიზსა და საფრანგეთის სხვა კუთხეებშია გადაღებული.

სერიალის შემქმნელი Sex And The City-ის ავტორი დარენ სტარია. კრიტიკის საპასუხოდ ის ამბობს:

"ეს ამერიკული შოუა და არა ფრანგული, მთლიანად ამერიკელის პოზიციიდანაა გადაღებული. როგორ გრძნობს თავს ის პარიზში. მე ვფიქრობ, რომ შოუ ორივე ქვეყნის კულტურაზე ხუმრობს".

ახალი სეზონი პერსონაჟის წერილით დაანონსდა — ამ წერილს ემილის ფრანგი ბოსი, სილვი, მის ამერიკელ ბოსს, მედელინს უგზავნის:

"სამწუხაროდ, მინდა გაცნობოთ, რომ ემილი კუპერს პარიზში დარჩენა კიდევ მოუწევს. მიუხედავად იმისა, რომ მას დიდი გამოცდილება არ აქვს ძვირფასეულობის მარკეტინგში, თუმცა მეტისმეტად თავდაჯერებულია, მან შეძლო და მოხიბლა Savoir-ის რამდენიმე კლიენტი. მისი შედეგები შთამაგონებელია და ამას თუ გსურთ იღბალი უწოდეთ, თუ გსურთ — ამერიკული გამჭრიახობა. ჩვენ გვიყვარს ემილი პარიზში, მაგრამ გთხოვთ, ამას ნუ ეტყვით!".

ფოტო: Deadline

ჯერჯერობით უცნობია, როდის დაიწყება ახალი სეზონის გადაღება, ამიტომ, მისი გამოსვლის თარიღსაც ვერ ვივარაუდებთ.