თბილისის საჯარო საბავშვო ბაღებში კვების შეზღუდვები მოხსნილია და აღსაზრდელები სტანდარტული მენიუთი იკვებებიან. როგორც თბილისის ბაგა-ბაღების მართვის სააგენტოს ხელმძღვანელმა, გურამ ოქროპირიძემ "ინტერპრესნიუსს" განუცხადა, ბაღები ჩვეულ რეჟიმს დაუბრუნდნენ და თითოეული ბავშვისთვის დღიური კალორიული ნორმა 1292 კალორიას შეადგენს.

გურამ ოქროპირიძის თქმით, კვების რაციონთან დაკავშირებული ცვლილებები კომპეტენტური უწყებების რეკომენდაციებს უკავშირდებოდა, რომლებიც ახლა უკვე გაუქმებულია.

"28 სექტემბრიდან თბილისის საბავშვო ბაგა-ბაღებში მოიხსნა ის შეზღუდვები, რაც კვების რაიონში კომპეტენტური უწყებების რეკომენდაციების საფუძველზე იყო დადგენილი. დღეიდან საბავშვო ბაღებში სტანდარტით გათვალისწინებული კვების მენიუ მოქმედებს — დღიური 1292 კალორია თითოეულ აღსაზრდელზე.

ზოგადად, საბავშვო ბაღებში სანიტარულ-ჰიგიენური ნორმების დაცვა რეგულირდება ტექნიკური რეგლამენტი N485-ით "ადრეული და სკოლამდელი აღზრდისა და განათლების დაწესებულებების სანიტარული და ჰიგიენური ნორმების" დამტკიცების შესახებ. 2026-2027 სააღმზრდელო წლის დასაწყისში ნოროვირუსით ინფიცირების ფაქტების გამოვლენის შემდეგ კი საბავშვო ბაღებს მიეცათ დამატებითი მითითებები ვირუსის გავრცელების პრევენციისა და ზოგადად, ბავშვთა და თანამშრომელთა ჰიგიენის დაცვის კუთხით, იქნება ეს პირადი ჰიგიენა, ჯგუფების დასუფთავება თუ საპირფარეშოს მოხმარების წესების კონტროლი", — განაცხადა გურამ ოქროპირიძემ.

შეგახსენებთ, 18 სექტემბერს თბილისის 20 ბაღში 55 აღსაზრდელისა და ერთი აღმზრდელის ინტოქსიკაციის შესახებ გავრცელდა ინფორმაცია. დაავადებათა კონტროლისა და საზოგადოებრივი ჯანმრთელობის ეროვნული ცენტრის ცნობით, ჩატარებული კვლევებით დადასტურდა, რომ გახშირებული გასტროენტერიტის შემთხვევების მიზეზი ნოროვირუსი იყო.