ვინ გაუგებს სერიალ Normal People-ის სევდიან და ვნებიან გმირებს იმაზე უკეთ, ვიდრე Fleabag-ის წარმოუდგენლად სექსუალური მღვდელი? არც არავინ, ჰოდა ამიტომაც აღმოჩნდნენ ისინი სწორედ ამ მღვდლის კაბინაში ცოდვების მოსანანიებლად.

Amazon Prime-ისა და Hulu-ს ეს ორი ცნობილი სერიალი გაერთიანდა, რათა ირლანდიური საქველმოქმედო ფონდისთვის შემოწირულობები შეეგროვებინათ, რომელიც კორონავირუსის პანდემიის დროს განსაკუთრებულად დაზარალებულ მოქალაქეებს ეხმარება.

შეგახსენებთ, რომ ენდრიუ სკოტი, რომელიც Fleabag-ში მღვდელს განასახიერებს და პოლ მესკალი, რომელიც Normal People-ში კონელის როლს ასრულებს, ირლანდიელები არიან.

საქველმოქმედო მიზნით სწორედ ამ ორი შოუს საერთო ვიდეო შექმნეს, რომელიც ის იშვიათი გამონაკლისია, როცა Normal People-ის პერსონაჟების მოსმენისას დამწუხრების ნაცვლად, ალბათ, უფრო გაიცინებთ:

"დამლოცეთ, მამაო, რადგან შევცოდე. შეყვარებული ვარ, მაგრამ ყველაფერი უფრო რთულადაა", — ეუბნება კონელი მღვდელს ვიდეოს დასაწყისში.

Fleabag-ის ერთგული მაყურებლებისთვის კარგად ნაცნობი მომხიბვლელი მღვდელი კი მიუგებს:

"მომიყევი ამის შესახებ".

"თავს ისე ვგრძნობ, რომ ჩემთვის საყვარელ ადამიანს ტკივილს ვაყენებ. ძალიან დაბნეული ვარ. ჩვენი ურთიერთობის ფიზიკური მხარე იდეალურადაა, მაგრამ როცა ვცდილობ, რომ ვისაუბრო და გრძნობები გამოვხატო, მაშინ უკვე ყველაფერი ჩახლართული ხდება", — უმხელს კონელი მას.

ვისაც Fleabag უნახავს, კარგად იცის, რომ ენდრიუ სკოტის პერსონაჟს სულაც არ სჭირდება ახსნა, თუ როგორი შეიძლება იყოს გაურკვეველი, დამაბნეველი და ჩახლართული ურთიერთობა წყვილს შორის.

Fleabag ფიბი უოლერ-ბრიჯის ემის მფლობელი სერიალია, Normal People კი მწერალ სალი რუნის ბესტსელერი რომანის ეკრანიზაციაა, რომელიც ცოტა ხნის წინ გამოვიდა და მაყურებლების დიდი მოწონება დაიმსახურა.