მას შემდეგ, რაც ნეტფლიქსის დოკუმენტური სერიალი Tiger King მილიონობით მაყურებლის ნამდვილი აღმოჩენა გახდა, არაერთი ცნობილი ადამიანი გაერთიანდა და აშშ-ის მთავრობას ვეფხვების დაცვის გამკაცრების მოთხოვნით მიმართეს.

ამისათვის რეჟისორმა გაბრიელა კაუპერთვეიტმა სპეციალური პეტიცია შექმნა. გაბრიელამ 2013 წელს გადაიღო დოკუმენტური ფილმი Blackfish, რომელიც ვეშაპებზე უხეში მოპყრობის შესახებ მოგვითხრობს, რამაც მაშინ კანონების გადახედვაც კი გამოიწვია. ის იმედოვნებს, რომ ახლაც Tiger King-ით საზოგადოების დაინტერესება მსგავს ცვლილებებს მოიტანს.

"დოკუმენტურ ფილმებს აქვთ ძალა, რომ რაღაცები უკეთესობისკენ შეცვალონ: ხანდახან პირდაპირი მოქმედების მოწოდებით, ხანაც კი ისეთი ამბების მოთხრობით, რომელთა შესახებაც მანამდე მაყურებლებმა არაფერი იცოდნენ. მაგრამ არის ისეთი შემთხვევებიც, როცა მილიონობით მაყურებლის დაგროვილმა ემოციამ რაღაც სასიკეთოდ გარდამტეხი ცვლილება უნდა მოიტანოს. Tiger King-ის მაყურებლებს ახლა სწორედ ამის გაკეთება შეუძლიათ", — აცხადებს კაუპერთვეიტი.

საჯაროდ გამოქვეყნებულ პეტიციას, რომელიც სახელმწიფოს ვეფხვების "კერძო შეძენისა და ბოკვერების გაზრდის" უფლების შეზღუდვისკენ მოუწოდებს, ხელს ისეთი ცნობილი ადამიანები აწერენ, როგორებიც არიან ხოაკინ ფენიქსი, რუნი მარა, გლენ ქლოუზი, ჯასტინ ტერუ და სხვა.

Tiger King ზოოპარკის მფლობელი ჯო ეგზოტიკის რეალური ისტორიის შესახებ მოგვითხრობს, რომელიც ცხოველებზე სასტიკ მოპყრობაში დაადანაშაულეს. გაბრიელა კაუპერთვეიტის თქმით კი ამერიკაში დღემდე უამრავი ვეფხვი ჰყავთ კერძო სახლებში, სადაც ცხოველებს მათთვის შეუფერებელ პირობებში ამყოფებენ.