აფხაზეთში რუსი ტურისტის მკვლელობის ფაქტზე 25 წლის კაცი დააკავეს. როგორც დე ფაქტო აფხაზეთის ე.წ შინაგან საქმეთა სამინისტრო იტყობინება, ახალგაზრდა ქალის ცხედარი ბუჩქებში იპოვეს.

რუსული მედიის ცნობით, რუსეთიდან ჩასული ტურისტი გაგრაში ისვენებდა, სადაც მან 25 წლის ეგკარ აბუხბა გაიცნო. გოგონა მასთან ერთად სოფელ ფსახარაში წავიდა, რის შემდეგაც გარდაცვლილთან კავშირი გაწყდა. როდესაც ნათესავებმა განგაში ატეხეს, სამართალდამცველებმა ძებნა დაიწყეს.

ეჭვმიტანილი სამართალდამცველებმა მალევე დააკავეს. გამოძიების ინფორმაციით, მან აღიარა, რომ გოგონასთან კამათი მოუვიდა და გაგუდა. დანაშაულის დამალვის მიზნით, მან მეგობარს მანქანა სთხოვა, ცხედარი საბანში გაახვია და ბზივის ხეობაში წაიღო, რათა მდინარეში ჩაეძირა, თუმცა ეს "ფიზიკურად ვერ შეძლო" და ცხედარი გზისპირა ბუჩქებში მიატოვა.

მკვლელმა მსხვერპლის ტელეფონი და პირადი ნივთები ნაგვის კონტეინერებში გადაყარა. საქმეზე გამოძიება გრძელდება.