ოკუპირებულ აფხაზეთის დე ფაქტო მინისტრთა კაბინეტმა ბიტკოინების მოპოვება 2021 წლის პირველ ივნისამდე აკრძალა. დოკუმენტში, ასევე, წერია, რომ მიმდინარე წლის 20 დეკემბრიდან მომდევნო წლის პირველ ივნისამდე აკრძალულია კრიპტოვალუტის გამომუშავებისთვის საჭირო დანადგარების შეტანა. მიზეზი შექმნილი ენერგოკრიზიზია, რაც ნაწილობრივ ბიტკოინების გამომუშავებამაც გამოიწვია.

კრიპტოვალუტის მაინინგი აფხაზეთში 2018 წლიდან აკრძალული იყო. ბიტკოინების გამომუშავებამ აფხაზეთში ელექტროენერგიის მკვეთრი ზრდა გამოიწვია.

აფხაზეთში კრიპტოვალუტის მაინინგზე აკრძალვა მიმდინარე წლის 21 სექტემბერს მოხსნეს.

გარდა ამისა, 2021 წლის დასაწყისიდან, სარეკონსტრუქციო სამუშაოების გამო, დროებით ჩერდება ჰიდროელექტრო სადგური ენგურჰესი, რაც რეგიონში ენერგოკრიზისს კიდევ უფრო გაამწვავებს. ქართულ და აფხაზურ მხარეს შორის მიღწეული შეთანხმების მიხედვით, ენგურჰესის მიერ გამომუშავებული მთლიანი ენერგიის 60% ქართულ მხარე, 40% კი აფხაზეთი მოიხმარს. თუმცა, ზამთრის პერიოდში აფხაზეთი ელექტროენერგიის 100%–ს მოიხმარდა. ჰიდროელექტროსადგური თავის გამომუშავებულ ელექტროენერგიაში თანხას არ იღებს და მოსახლეობის მიერ გადახდილი თანხა აფხაზურ მხარეს რჩება.

დღესდღეობით, ენგურჰესი ერთადერთი ობიექტია, სადაც ქართველები და აფხაზები შეთანხმებულად მუშაობენ. მისი ინფრასტრუქტურის ნაწილი აფხაზეთის მხარეს, ნაწილი კი საქართველოს კონტროლირებად ტერიტორიაზე.

აფხაზეთში ამჟამად გამრიცხველიანების სისტემა არ მოქმედებს. გალის რაიონის მოსახლეობა ბოლო წლებში, დენის მოხმარებისთვის ყოველწლიურად 4 800 რუსულ რუბლს იხდის. კურსის ცვალებადობის მიხედვით, ეს თანხა 200–230 ლარამდე მერყეობს.

გაიგეთ მეტი: