Choose your warrior! — 2020 წელმა იმდენჯერ გაგვიცრუა იმედი, კორონავირუსის წინააღმდეგ დაუმარცხებელ მოწინააღმდეგედ ამიერიდან მხოლოდ 2021 წელი წარმოგვიდგენია. ჩვენი იმედები კი ზუსტად ასახა კრეატიულმა სააგენტო Leavingstone-მა ოპტიმიზმითა და ენერგიით სავსე ახალ საახალწლო რეკლამაში.

2020 წელია. დახურული წვეულებები, კონცერტები და ქორწილები იმართება. გოგონა, რომელიც აშკარად მარია ანტუანეტას გავლენის ქვეშაა, პირბადეს იხსნის და ტორტის კრემს თითით უსინჯავს გემოს. სწორედ ამ დროს ჩნდება დაუპატიჟებელი სტუმარი — რომელსაც ყველა მარტივად იცნობთ.

"რაო? არ გაგიგია ძველი ანდაზაო? ერთმა ჭუჭყიანმა ღორმა 100 სუფთა გასვარაო", — მღერის აღტაცებული კორონავირუსი და გარშემო ყველას ატერორებს.

საბედნიეროდ, მალე მხსნელად გვევლინება ვარდისფერთმიანი მებრძოლი, მენტალურად ძლიერი ახალი წელი, რომელიც ბოროტ სტუმარს რინგზე ეპატიჟება, მის პარპაშს ბოლოს უღებს და ამარცხებს კიდეც.

რეკლამაში უამრავი მინიშნებაა პანდემიურ რეალობაზე — დოლარის კურსი, "2, 3 კვირაც და..." მოსწავლეები პლანშეტებით და ა.შ. რეკლამისთვის შექმნილი მუსიკა, რომელსაც თავიდან ვერ ამოიგდებ, Postred-ს ეკუთვნის.

კარგია, რომ 2020 წელს კარგი ქართული საახალწლო რეკლამის ფუფუნება გვაქვს, რადგან ის იმედიანი განწყობა და ენერგია, რომელიც ლივინგსტონის ახალ რეკლამაშია, 2021 წელს ყველას გვჭირდება.