გიორგი შაქარაშვილის განზრახ მკვლელობაში ბრალდებულების ადვოკატების განცხადებით, მოსამართლემ მათი სასამართლო პროცესები კვირაში 2 დღის ნაცვლად, 3 დღე ჩანიშნა. ადვოკატების თქმით, ეს მათ განცდას უქმნის, რომ სასამართლოს უკვე მიღებული აქვს გადაწყვეტილება და მის აღსრულებას დაჩქარებულ რეჟიმში ცდილობს.

"ჩვენ არ მივიღებთ ამ ფორმალურ მასკარადში მონაწილეობას და დღეს დავიწყებთ წერილობით მიმართვებს, იუსტიციის უმაღლეს საბჭოსთან პირველ რიგში. ასევე, მივმართავთ სახალხო დამცველს და მოვუწოდებთ მას აქტიურ ჩართულობას საქმეში", — განაცხადა ერთ-ერთი ბრალდებულის, არჩილ გაგნიძის ადვოკატმა ვასილ მამულაშვილმა.

ბრალდებულის მეორე ადვოკატის, ბექა ნემსიწვერიძის თქმით კი, მოსამართლემ მათ მოწმეების დაკითხვის დროც განუსაზღვრა და მათ მხოლოდ 1 საათი მისცა თითოეულის დასაკითხად.

"მოსამართლემ ჩათვალა, რომ ჩვენ ძალიან დიდხანს ვკითხავთ მოწმეებს რომ ეს არ გამომდინარეობს საქმის ინტერესებიდან და გვითხრა, 1 საათი სავსებით საკმარისიაო", — განაცხადა ადვოკატმა.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.

რაც შეეხება, ამ საქმეზე ძალადობის ორგანიზებაში, მასში მონაწილეობასა და თავისუფლების უკანონო აღკვეთაში ბრალდებულ 6 არასრულწლოვანს სასამართლომ სამი, ხუთი და ექვსი წლით თავისუფლების აღკვეთა 20 ნოემბერს მიუსაჯა.

19 წლის ფეხბურთელი, გიორგი შაქარაშვილი 19 ივნისს დაიკარგა. დადგინდა, რომ ის მცხეთაში, დაბადების დღეზე იმყოფებოდა, სადაც ახალგაზრდებს შორის დაპირისპირება მოხდა. ამის შემდეგ ერთმა ჯგუფმა თბილისიდან "დახმარება გამოიძახა". შაქარაშვილი და კიდევ 5 ადამიანი აგარაკიდან მათ მოსვლამდე წამოვიდა. პროკურატურის მიერ გავრცელებულ კადრებში ჩანს, რომ უკვე არაგვის ხიდთან მყოფ ახალგაზრდებს მანქანიდან გადმოსული ადამიანები თავს დაესხნენ, რის შემდეგაც შაქარაშვილი და მასთან ერთად მყოფი პირები გაიქცნენ. ფეხბურთელის კვალი აქედან იკარგება, მასთან ერთად მყოფი 5 ადამიანი კი თბილისში ცალ-ცალკე, სხვადასხვა დროს დაბრუნდა.

4-დღიანი ძებნის შემდეგ, 22 ივნისს, გიორგი შაქარაშვილი ცხედარი მდინარე არაგვში იპოვეს. რამდენიმე დღეში საქმეზე 17 ადამიანი დააკავეს, მათგან 6 არასრულწლოვანია.

თავდაპირველად, მათ ბრალი ორი ან მეტი პირის მიმართ განხორციელებული ჯგუფური ძალადობის, ჯგუფური ძალადობის ორგანიზების და ამავე ძალადობაში მონაწილეობის და ჯგუფურად თავისუფლების უკანონო აღკვეთის საქმეზე წარუდგინეს. როგორც ექსპერტიზის დასკვნის შემდეგ უწყებაში განაცხადეს, საქმეზე კვალიფიკაცია დაზუსტდა და ამ საქმეზე გამოძიება დამამძიმებელ გარემოებებში ჯგუფურად განხორციელებული განზრახ მკვლელობის მუხლით გაგრძელდა.