როგორც უკვე ვიცით, მართალია, სერიალ ეიფორიის (Euphoria) მეორე სეზონი მოსალოდნელზე უფრო გვიან გამოვა (სავარაუდოდ, 2021 წელს), მაგრამ სანაცვლოდ შოუს შემქმნელები წინასაახალწლოდ ერთგული ფანების გასახარებლად ორ სპეციალურ ეპიზოდს გამოუშვებენ, რათა მონატრება ცოტათი მაინც შევიმსუბუქოთ.

ჯერჯერობით უცნობია, თუ როდის გამოვა მეორე ეპიზოდი, თუმცა ვიცით, რომ პირველი სპეციალური სერიის ხილვა სულ რამდენიმე დღეში, 6 დეკემბერს შეგვეძლება.

ამის შესახსენებლად შოუს ვარსკვლავმა ზენდეიამ პირველი ეპიზოდის პოსტერიც გაგვიზიარა, რომლის სახელწოდებაა Trouble Don’t Last Always (გასაჭირი სამუდამოდ არ გრძელდება).

პირველი ეპიზოდის დაანონსებისთანავე ცნობილი იყო, რომ სიუჟეტი ძირითადად მთავარი გმირის, რუს ირგვლივ განვითარდებოდა: პირველი სპეციალური სერია მატარებლის სადგურზე ჯულსის მიტოვების შემდეგ რუს თავსდამტყდარ ამბებზე მოგვითხრობს.

გავიგებთ, როგორ აღნიშნავს ზენდეიას პერსონაჟი შობას მარტო და მის ისტორიას თუ გავითვალისწინებთ, ალბათ, წინასაახალწლოდ დეპრესიულ განწყობასაც შეგვიქმნის.

მართალია, ჯერ არ ვიცით, რის შესახებ იქნება მეორე სპეციალური ეპიზოდი ან როდის გამოვა ის, თუმცა თუ გავითვალისწინებთ იმას, რომ პირველი ეპიზოდის სახელწოდებაა რუ, მეორე ეპიზოდი ალბათ ჯულსის თვალთახედვით მოგვითხრობს განვითარებულ მოვლენებს.

ისღა დაგვრჩენია, კიდევ ცოტა მოვითმინოთ და სულ მალე, საყვარელ პერსონაჟებს კვლავ ეკრანზე ვიხილავთ.