საერთაშორისო გამჭვირვალობა - საქართველო მიიჩნევს, რომ საქართველოს პარლამენტი საზოგადოებრივი მაუწყებლის სამეურვეო საბჭოს წევრის კონკურსის არ გამოცხადებით მაუწყებლობის შესახებ კანონს არღვევს. ამის შესახებ ინფორმაცია TI-მ დღეს გაავრცელა.

„პარლამენტი მეტი პასუხისმგებლობით უნდა მოეკიდოს საზოგადოებრივი მაუწყებლის საბჭოს დაკომპლექტებას და დროულად უზრუნველყოს საბჭოს შევსება ახალი წევრებით, რათა გარანტირებული იყოს სამეურვეო საბჭოს შეუფერხებელი მუშაობა. ასევე მაუწყებლის სამეურვეო საბჭოს წევრების არჩევა უნდა იყოს გამჭვირვალე და მაქსიმალურად ობიექტური პროცესი, რაც თავის მხრივ მაუწყებლის დამოკიდებლობის ერთ-ერთი წინაპირობაა,“ - აღნიშნავს საერთაშორისო გამჭვირვალობა.

საზოგადოებრივი მაუწყებლის 9-წევრიანი სამეურვეო საბჭო 8 წევრით არის დაკომპლექტებული. ვაკანტურია უმრავლესობის მიერ დასასახელებელი მეურვის კვოტა. მეურვის თანამდებობა მას შემდეგ გახდა ვაკანტური, რაც ნათელა სახოკიამ, შვილის - ირაკლი რუხაძის ტელეკომპანია იმედის სამეთვალყურეო საბჭოს თავმჯდომარედ დანიშვნის გამო, 13 ივნისს დატოვა.

მეურვის თანამდებობა ვაკანტურია საზოგადოებრივი მაუწყებლის აჭარის ტელევიზიაში და რადიოშიც. იქ 2016 წლის 19 აგვისტოს 5-წევრიანი მრჩეველთა საბჭო ზაზა ხალვაშმა დატოვა. ის საბჭოში უმრავლესობის მიერ იყო წარდგენილი. შესაბამისად, მის ნაცვლად კანდიდატის დასახელების უფლება კვლავ უმრავლესობას ექნება. თუმცა, კონკურსი ამ დრომდე არ გამოცხადებულა.

მაუწყებლობის შესახებ კანონით, მეურვის უფლებამოსილების შეწყვეტიდან 10 კალენდარული დღის განმავლობაში საქართველოს პარლამენტის თავმჯდომარე გამოსცემს ბრძანებას კონკურსის გამოცხადების შესახებ, რომლითაც განსაზღვრავს მეურვეობის კანდიდატთა მიერ განაცხადების წარდგენის ვადას არაუმეტეს 15 კალენდარული დღისა. თუმცა, აჭარის ტელევიზიისა და რადიოს შემთხვევაში, საქართველოს კანონმდებლობაში მსგავსი ნორმა არ დევს.