ქართული ოცნების აღმასრულებელი მდივანი, ირაკლი კობახიძე ოპოზიციის მიერ საპარლამენტო მანდატებზე უარის თქმას შანტაჟს უწოდებს და ამბობს, რომ საქართველოს კონსტიტუცია შეიცავს მსგავსი შანტაჟის საწინააღმდეგო მექანიზმს. ღამის კურიერის ეთერში კობახიძემ განაცხადა, რომ პარლამენტის სრული შემადგენლობის უმრავლესობის გადასაწყვეტია, მისცემს თუ არა კონკრეტულ დეპუტატს მანდატზე უარის თქმის უფლებას.

"კონსტიტუცია შეიცავს შანტაჟის საწინააღმდეგო მექანიზმს. პროცედურები ისეა გაწერილი, რომ პარლამენტის ნების გარეშე, ამ შანტაჟს ვერავინ ვერ განახორციელებს. თავდაპირველად ხდება 150 დეპუტატის უფლებამოსილების ცნება. ანუ, ყველა შემთხვევაში, რა პოზიციაც არ უნდა ჰქონდეთ შესაბამის დეპუტატებს, 150-ვე დეპუტატი ითვლება დეპუტატად მას შემდეგ, რაც პირველ სხდომაზე 76 დეპუტატი, ანუ, უმრავლესობა, დაადასტურებს მათ უფლებამოსილებას. ამის შემდეგ, თითოეულ მათგანს შეუძლია, რა თქმა უნდა, დაწეროს განცხადება პარლამენტიდან გასვლაზე, მაგრამ, პარლამენტის გადასაწყვეტია, დაატოვებინებს თუ არა მათ პარლამენტს. ისევ 76-მა უნდა უყაროს კენჭი. ეს არის შანტაჟის საწინააღმდეგო მექანიზმი. პარლამენტს შეუძლია კენჭი არ უყაროს მათ გასვლას პარლამენტიდან", — აცხადებს კობახიძე.

კობახიძე ამბობს, რომ ეს თეორიული მსჯელობაა და ქართულ ოცნებას გათვლა აქვს არა კონსტიტუციის "შანტაჟის საწინააღმდეგო მექანიზმის" ამოქმედებაზე, არამედ იმაზე, რომ ოპოზიცია, საბოლოოდ, მაინც შევა პარლამენტში.

"ეს არის, პრინციპში, თეორიული მსჯელობა. გამომდინარე იქიდან, რომ ჩვენ გვაქვს გათვლა სრულიად სხვა რამეზე. არა იმაზე, რომ მოგვიწევს ჩვენ ამ შანტაჟის საწინააღმდეგო მექანიზმის ამოქმედება, არამედ იმაზე, რომ პოლიტიკური პარტიები მაინც შემოვლენ პარლამენტში", — აცხადებს ირაკლი კობახიძე.

საპარლამენტო არჩევნები საქართველოში 31 ოქტომბერს ჩატარდა. ოპოზიცია შედეგებს არ აღიარებს და ბოიკოტის რეჟიმშია — უარს ამბობს პარლმენტში შესვლაზე და მეორე ტურში მონაწილეობას არ აპირებს.

გაიგეთ მეტი:

რა შემთხვევაში ჩატარდება რიგგარეშე არჩევნები